“O‘zbekistonda tuproq unumdorligi keskin kamayib ketyapti” – Qishloq xo‘jaligi vazirligi rasmiysi

Toshkent shahrida 1—2-iyun kunlari “O‘zbekiston rivojlanish yo‘lida: qishloq xo‘jaligi va oziq-ovqat tadqiqotlarini transformatsiya qilish” mavzusida forum bo‘lib o‘tmoqda. Mazkur tadbir mamlakatning qishloq xo‘jaligi va oziq-ovqat sohasida ilmiy tadqiqotlarning ijobiy ta’sirini oshirish maqsadida o‘tkazilmoqda, deya xabar bermoqda “Daryo” muxbiri.

Forum doirasida Qishloq xo‘jaligi vazirligi boshqarma boshlig‘i Shuhrat Omonov OAV vakillariga intervyu berarkan, iqlim o‘zgarishining mamlakat qishloq xo‘jaligi sohasiga ta’siri xususida so‘z yuritdi.

“Iqlim o‘zgarishi global muammolardan biri hisoblanadi. Bunga qarshi kurashish va salbiy oqibatlarning oldini olishda ilm-fanning ahamiyati juda katta. Bugungi kunda o‘zbek olimlari qurg‘oqchilikka, sovuq va sho‘rga chidamli bo‘lgan navlarni yaratish ustida jiddiy ishlarni olib bormoqda. Bu albatta, ma’lum vaqtni talab qiladi. Ammo bunga qaramay, seleksiyaning yoki urug‘chilikning yangi tizimlari bo‘yicha ham ishlar qilinyapti. Misol uchun, biotexnologiya tizimi asosida yangi navlarni yaratib, ularni ishlab chiqaruvchilarga tezroq yetkazish, agrotexnikadan to‘g‘ri foydalanish masalalariga yechim topilmoqda.

Shuningdek, hozirgi paytda tuproq unumdorligining keskin kamayib ketish masalasi ham oldimizda turibdi. Olimlarimiz tomonidan tuproq unumdorligini oshirish borasida bir qator ishlar qilinmoqda. Mikrobiologik preparatlar bilan tuproqdagi mikroorganizmlarni jonlantirish, o‘zlashtirilmay qolgan o‘g‘itlarni yana-da o‘zlashtirishga jiddiy e’tibor berilyapti”, — deydi vazirlik rasmiysi.