Davlat xavfsizlik xizmatining Andijon viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda Andijon shahrida o‘tkazilgan tezkor tadbir natijasida Qirg‘izistondan noqonuniy olib kelingan kuchli ta’sir qiluvchi dori vositalarini sotish bilan shug‘ullangan jinoiy guruh faoliyatiga chek qo‘yildi. Bu haqda DXX matbuot xizmati “Daryo”ga ma’lum qildi.
Olingan ma’lumotlarga ko‘ra, muqaddam sudlangan aka-uka (1988 va 1991-yillarda tug‘ilgan) tomonidan 2 nafar qarindoshlarini jalb etgan holda, kishiga vaqtinchalik sarxushlik bag‘ishlaydigan kuchli ta’sir qiluvchi dori vositalarining barqaror savdosi yo‘lga qo‘yilgan.
Dastlab, viloyat markazidagi “Navoiy” shohko‘chasida o‘tkazilgan tezkor tadbirda 25 yoshli muqaddam sudlangan shaxs boshqaruvidagi Nexia-3 rusumli avtomashina to‘xtatilib tekshirilganda, uning salonida 70 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirilib olingan.
So‘ngra uning ko‘rsatmasi asosida jinoiy guruhning boshqa bir a’zosi — muqaddam uch marotaba sudlangan 39 yoshli ayolning yashash xonadonidan tarkibida psixotrop moddalar turkumiga kiruvchi “trigeksifenidil gidroxlorid” moddasi bo‘lgan 75 dona “Siklodol” dori vositasi, shuningdek, 1715 dona “Regapen”, 211 dona “Tropikamid”, 200 dona “Zardeks”, 185 dona “Lirika” kuchli ta’sir qiluvchi dori vositalari tegishli tartibda hujjatlashtirilib olingan.
Bundan tashqari, jinoiy guruh yetakchilari bo‘lgan aka-ukaning mahalliy aholi orasida elektroset ko‘chasi deya ataluvchi A.Haydarov ko‘chasida joylashgan yashash xonadonlarida va shaharning Amir Temur ko‘chasida joylashgan ularga tegishli “XXX” tungi klubida va avtomashinalar yuvish shoxobchasida ham tintuv-tergov harakatlari o‘tkazilgan.
Natijada, kelgusida sotish maqsadida saqlab kelinayotgan umumiy qiymati 103 million so‘mlik 3 ming dona “Tropikamid”, “Regapen” “Lirika” nomli kuchli ta’sir qiluvchi dori vositalari, “bita” tayoqlari, o‘tkir tig‘li jismlar, aloqa vositalari, katta miqdordagi pul mablag‘lari, hisob-kitob daftarlari, garov sifatida qoldirib ketilgan haydovchilik guvohnomasi, diplom, nikoh tuzilganligi haqida guvohnoma, fuqarolik pasportlari aniqlanib, protsessual tartibda rasmiylashtirib olingan.
Shuningdek, DXX xodimlari tomonidan kuchli ta’sir qiluvchi dori vositalari savdosiga qarshi o‘tkazilgan boshqa bir tezkor tadbirda esa Andijon shahrida yashovchi fuqaro (1986-yilda tug‘ilgan) boshqaruvidagi Cobalt avtomashinasi shaharning “Do‘stlik” MFY hududida to‘xtatilib tekshirilgan. Tekshiruv davomida mashinadan 2296 dona “Lirika”, 1598 dona “Tropikamid” va 337 dona “Regapen” dori vositalari borligi aniqlanib, o‘rnatilgan tartibda olib qo‘yilgan.
Bu kabi tadbirlardan yana biri Oltinko‘l tumanida o‘tkazilib, unda Namangan—Andijon yo‘nalishida harakatlanib kelayotgan Lacetti avtomashinasida 4032 dona “Regapen” hamda 971 dona “Tropikamid” kuchli ta’sir qiluvchi dori vositalari borligi aniqlangan. Ma’lum bo‘lishicha, Oltinko‘l tumanida yashovchi 38 yoshli hamda Andijon shahrida istiqomat qiluvchi 27 yoshli fuqarolar ushbu dori vositalarini Andijon shahrida sotishni rejalashtirgan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Farg‘onada tomorqasida 100 tup ko‘knori yetishtirayotgan shaxs aniqlangani, Toshkent shahri va viloyatida kuchli ta’sir qiluvchi dorilar savdosi bilan shug‘ullangan 9 kishi ushlangani to‘g‘risida xabar berilgandi.
Izoh (0)