«Бектемир-спирт» заводининг давлат улуши қарийб 49 млрд сўмга сотилди

Тошкент шаҳар, Бектемир туманида жойлашган «Бектемир-спирт экспериментал заводи»нинг 51 фоиз давлат акциялари кимошди савдосида сотилди. Бу ҳақда Давлат активларини бошқариш агентлиги хабар берди.

«Бектемир-спирт экспериментал заводи» 2007 йилда ташкил этилган. Асосий йўналиши — истеъмол қилинадиган этил спиртини ишлаб чиқариш ва сотиш.

Устав капитали 21 млрд сўм бўлиб, номинал қиймати 500 сўм бўлган 42 млн дона оддий акцияларга бўлинган.

2021 йил IV чорак якуни бўйича компания соф активлари қиймати 60,8 млрд сўмни ташкил этади. Жорий йил заводда жами 113,7 млрд сўмлик 1 млн 500 минг декалитр спирт ишлаб чиқариш режалаштирилган.

Тахминий ҳисоб-китобларга кўра, сотишдан олинган соф тушум 82,79 млрд сўмни, йиллик соф фойда эса 7,5 млрд сўмни ташкил қилиши керак.

Заводнинг 51 фоиз акцияларига «Тошкентвино» 48,8 млрд таклиф қилиб, аукцион ғолиби бўлди.

«Тошкентвино» заводи «Ўзвинсаноат» холдинг компанияси корхоналари орасидаги кўп тармоқли корхона. Ўзининг 4 та заводида йилига 6,5 ​​млн декалитрдан ортиқ ароқ ва алкоголли ичимликлар ишлаб чиқаради.

Аввалроқ МИБ Тошкент вилоятидаги спиртли ичимликлар ишлаб чиқариш заводини аукционга қўйгани ҳақида хабар берилган эди.