O‘zbekistonda xorijdan qaytgan migrantlarni ishga qabul qilganlarga subsidiya berilishi kutilmoqda

Bandlik va mehnat munosabatlari vazirligi “Xorijda vaqtincha mehnat faoliyatini amalga oshirib O‘zbekiston Respublikasiga qaytib kelgan fuqarolarni ish bilan bandligini ta’minlash bo‘yicha qo‘shimcha chora-tadbirlari to‘g‘risida”gi prezidenti qarori loyihasini muhokamaga qo‘ydi.

Qaror loyihasiga ko‘ra, 2022-yil 1-iyuldan 2023-yil 1-yanvargacha Bandlikka ko‘maklashish davlat jamg‘armasi mablag‘lari hisobidan xorijdan qaytib kelgan mehnat migrantlarini ishga qabul qilgan ish beruvchilarga (budjet tashkilotlari, davlat korxonalari,ustav jamg‘armasi (kapitali)da davlat ulushi 50 foiz va undan ortiq bo‘lgan yuridik shaxslar bundan mustasno) har bir xodim uchun 6 oy davomida har oyda bazaviy hisoblash miqdorining 1,5 baravari miqdorida (405 ming so‘m) subsidiya beriladi.

Bunda, xorijdan qaytib kelgan mehnat migrantlarini ishga qabul qilgan tashkilotga subsidiya berishda Yagona milliy mehnat tizimida ro‘yxatdan o‘tkazilgan mehnat shartnomasi asos hisoblanadi.

Shuningdek, 2022-yil 1-iyuldan xorijda mehnat faoliyatini amalga oshirish natijasida orttirgan mablag‘lari hisobidan O‘zbekistonda tadbirkorlikni yo‘lga qo‘ymoqchi bo‘lgan mehnat migrantlari tomonidan tadbirkorlik faoliyatini tashkil etish uchun “50 x 50” tamoyili asosida dastur joriy etiladi. Bunda:

• loyiha umumiy qiymatining 50 foizi miqdorida, lekin bazaviy hisoblash miqdorining 150 baravaridan ko‘p bo‘lmagan miqdorda Bandlikka ko‘maklashish davlat jamg‘armasi hisobidan subsidiya ajratiladi;
• ajratiladigan subsidiyalar har bir ishga qabul qilingan fuqaro uchun bazaviy hisoblash miqdorining 30 baravaridan oshmasligi kerak;
• subsidiya ajratishda Yagona milliy mehnat tizimida ro‘yxatdan o‘tkazilgan mehnat shartnomasi asos hisoblanadi.

Shuningdek, xorijda vaqtinchalik mehnat faoliyatini amalga oshirayotgan yoki qaytib kelgan mehnat migrantlar uchun “O‘z kelajagimga o‘zim investor” loyihasi joriy etiladi. Bunda:

• dastur doirasida TIF “Milliy bank”, AT “Xalq banki” va AT “Sanoatqurilishbank” tomonidan kamida 1 ming nafar mehnat migrantiga ishlab chiqarish, qishloq xo‘jaligi, qurilish, transport, xizmat ko‘rsatish yo‘nalishidagi har bir loyiha uchun bazaviy hisoblash miqdorining 500 baravarigacha kredit ajratiladi;
• kredit olmoqchi bo‘lgan fuqaroning mehnat migratsiyasidan qaytganligi Tashqi mehnat migratsiyasi agentligining labor-migration dasturiy majmuasida qayd etilgan ma’lumotlar asosida taqdim etiladigan tasdiqnoma bilan tasdiqlanadi;
• dasturni amalga oshirish uchun Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘laridan mazkur kichik bandda ko‘rsatilgan banklarga 30 milliard so‘m miqdorida resurs ajratiladi;
• kredit resurslari Reintegratsiya markazi rahbari va Tashqi mehnat migratsiyasi agentligining hududiy filiallari tomonidan taqdim etiladigan manzilli ro‘yxat asosida moliyalashtiriladi;
• dastur doirasida 33 million so‘mgacha ajratilayotgan kredit mablag‘lari mahallalardagi hokim yordamchilari tavsiyasiga asosan garov ta’minotisiz ajratiladi.

Avvalroq Rossiyada o‘zbekistonlik migrantlarni moliyaviy bonuslar bilan jalb qilish taklif etilgani, O‘zbekiston fuqarolari endi Rossiyada 15 kungacha ro‘yxatdan o‘tmay yurishi mumkinligi to‘g‘risida xabar berilgandi.