O‘zbekiston Konstitutsiyasiga o‘zgartirish kiritish va tashkiliy chora-tadbirlarni amalga oshirish yuzasidan Konstitutsiyaviy komissiya tuzildi. Oliy Majlis Senati Kengashi va Qonunchilik palatasi Kengashining qo‘shma majlisida komissiyaning tarkibi va vazifalari belgilandi, deb xabar bermoqda “Daryo” muxbiri.
Komissiyaning tarkibiga deputatlar, senatorlar, barcha hududlardan vakillar, fuqarolik jamiyati institutlari vakillari, yetuk huquqshunos, siyosatshunos va boshqa ekspertlar kiritildi.
Majlisda senator va deputatlar tomonidan Konstitutsiyani takomillashtirish bo‘yicha bir qator fikr-mulohozalar bildirildi. Konstitutsiyaviy komissiya o‘z faoliyatini “Jamiyat — islohotlar tashabbuskori” degan g‘oya asosida olib boradi.
Komissiyaga aholining barcha qatlamlaridan Konstitutsiyaga o‘zgartirish va qo‘shimchalar kiritish bo‘yicha takliflarni olish borasida vazifalar qo‘yildi.
Oliy Majlisi Qonunchilik palatasi spikeri birinchi o‘rinbosari, Inson huquqlari bo‘yicha O‘zbekiston Milliy markazi direktori Akmal Saidov ushbu komissiyaga rais etib, O‘zLiDeP fraksiyasi rahbari Aktam Hayitov, “Milliy tiklanish” fraksiyasi rahbari Alisher Qodirov, Qoraqalpog‘iston Jo‘qori Kengesi raisi Murod Kamolov hamda Senatning Mudofaa va xavfsizlik masalalari qo‘mitasi raisi Qutbiddin Burhonov esa komissiya raisi o‘rinbosarlari etib tasdiqlandi.
Eslatib o‘tamiz, 16-may kuni Oliy Majlis Qonunchilik palatasida o‘tkazilgan yig‘ilishda O‘zbekiston Liberal-demokratik partiyasi konstitutsiyaga o‘zgartirish va qo‘shimchalar kiritish jarayonini boshlash taklifi bilan chiqqan edi. Shavkat Mirziyoyev 8-dekabr — Konstitutsiya bayrami munosabati bilan O‘zbekiston xalqiga yo‘llagan tabrigida mamlakat asosiy qomusiga o‘zgartirishlar kiritilishi mumkinligi haqida gapirgandi.
Izoh (0)