Namanganda 61-xalqaro gullar festivalining boshlanishiga 5 kun vaqt qoldi. Bu haqda “Daryo” muxbiri Azizbek Abduvaliyev xabar bermoqda.
Festival 22-may kuni start olib, 5-iyunda yakuniga etadi va ilk bor ikki hafta davomida bo‘lib o‘tadi.
Bayramning asosiy tadbirlari Namangan shahridagi Bobur nomli bog‘da o‘tkazilishi ko‘zda tutilgan.
Bog‘ hududida viloyatning shahar-tumanlari, yirik korxona, tashkilot va kompaniyalarning gul ko‘rgazmalari tashkil etilgan.
Bobur bog‘i atrofidagi hududda esa professional va havaskor gulchilar yetishtirgan gullar, ko‘chatlar namoyish etiladi va sotuvi tashkillashtiriladi.
Bog‘ hududini aylanib chiqish uchun elektromobillar va muqobil energiya yordamida harakatlanadigan boshqa transport vositalari qatnovi yo‘lga qo‘yilgan. Bolalar uchun mo‘ljallangan o‘yinchoq avtomobillarni esa sanab adog‘iga yetish qiyin.
Xalqaro gullar festivali boshlanishiga hali deyarli bir hafta vaqt bo‘lsa ham, tadbir o‘tkaziladigan Bobur nomli bog‘ allaqachon namanganliklar va mehmonlar bilan gavjum.
Izoh (0)