Ўзбекистонлик тадбиркорлар қишлоқ хўжалиги соҳасидаги ишбилармонлик муҳитини ижобий баҳолади. Бу ҳақда Иқтисодий тадқиқотлар ва ислоҳотлар маркази матбуот хизмати «Дарё»га маълум қилди.
Жорий йилнинг апрель ойида қишлоқ хўжалигида ишбилармонлик муҳитининг умумий кўрсаткичи бўйича сезиларли ўсиш қайд этилди. Кўрсаткич март ойига нисбатан 10 пунктга ошди.
Шу билан бирга, қишлоқ хўжалигида бизнеснинг ҳозирги кутиш кўрсаткичининг энг сезиларли ўсиши 11 пункт бўлди. Қишлоқ хўжалиги сектори хавф-хатар ва шокларга нисбатан энг барқарор характерга эга бўлиб, ҳукумат томонидан соҳада олиб борилаётган ислоҳотлар унинг самарадорлигини оширади.
Иқтисодий тадқиқотлар ва ислоҳотлар маркази Ўзбекистондаги корхоналар ўртасида навбатдаги сўровномани ўтказди. Апрель ойида икки йўналиш бўйича ўтказилган сўровда 1000 дан ортиқ корхона иштирок этди.
Жорий йилнинг март ойи билан таққослаганда, ишбилармонлик муҳитининг умумий кўрсаткичи ўзгаришсиз қолди ва 54 пунктни ташкил этди. Бу мамлакатдаги ишбилармонлик муҳитининг ҳолатини ижобий деб баҳолайди.
Тармоқлар контекстида ишбилармонлик муҳити кўрсаткичи қуйидаги бўлди:
- қишлоқ хўжалигида — 61 пункт;
- хизмат кўрсатишда — 55 пункт (2022 йил март ойида – 59 пункт);
- қурилиш соҳасида — 51 пункт (2022 йил март ойида – 56 пункт);
- саноатда – 48 пункт (2022 йил март ойида – 50 пункт).
Ўз бизнесининг ҳозирги ҳолатини яхши деб қайд этган респондентларнинг улуши 33 фоизни ташкил этди. Сўнгги 3 ой ичида бизнеснинг ҳолати қандай ўзгарганлиги ҳақидаги саволга, тадбиркорларнинг 32 фоизи – яхшиланди, 51 фоизи – ўзгармади ва 17 фоизи – ёмонлашди деб жавоб берди.
41 фоиз корхоналарда товар ва хизматларга бўлган талаб яхшиланди, ходимлар сони эса 23 фоиз корхоналарда ошди.
Қишлоқ хўжалигидаги ҳозирги ҳолат кўрсаткичи 43 пунктни, хизмат кўрсатишда – 34 пунктни, саноатда – 20 пунктни ва қурилишда – 34 пунктни ташкил этди.
Бизнесни ривожлантириш истиқболларини кутиш кўрсаткичи 78 пунктни ташкил этди, бу эса тадбиркорларнинг келгуси 3 ой давомида бизнесни ривожлантириш истиқболлари ҳақидаги умидларини оптимистик деб акс эттиради.
Тадбиркорларнинг 81 фоизи ўзларининг бизнес истиқболлари яхшиланишига ишонишади. 73 фоиз корхоналарда товар ва хизматларга бўлган талаб яхшиланиши, респондентларнинг 65 фоизи ишчилар сонининг кўпайишини кутмоқда.
Тадбиркорларнинг 35 фоизи товар ва хизматлар нархи кейинги 3 ой ичида ўзгармайди деб ишонади, 30 фоиз респондентлар нархлар кўтарилишини, 28 фоизи ўз товар ва хизматлар нархи яқин келажакда қандай ўзгаришини билишмайди ва 6 фоизи нархлар пасаяди деб тахмин қилишмоқда.
Умуман олганда, мавжуд вазият ва истиқболдаги кутилмалар ўртасидаги боғлиқлик шуни англатадики, тадбиркорлик субъэктларининг тахминларига кўра, иқтисодиётни ижобий ривожлантириш тенденцияси кейинги 3 ой ҳам давом этади.
Сўровда иштирок этган тадбиркорлар орасида 37 фоиз тадбиркорлик фаолиятини ривожлантиришда ҳеч қандай тўсиқ йўқлигини таъкидлади.
Изоҳ (0)