Surxondaryoda non ishlab chiqarish sexi va do‘kon qurish uchun ajratilgan 2 mlrd so‘m kreditni o‘zlashtirgan tadbirkor ushlandi

O‘zbekistonning turli hududlarida bank kredit mablag‘larini talon-toroj qilgan MCHJ rahbarlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.

Qayd etilishicha, Bosh prokuratura huzuridagi departamentning Sho‘rchi tuman bo‘limi tomonidan “Qishloq qurilish bank” ATB Sho‘rchi filialining murojaatiga asosan tergovga qadar tekshiruv o‘tkazilgan. Unda, “K.J.” MCHJ rahbari B.E. garov ta’minoti sifatida qo‘yilgan bino-inshootlarni soxta hujjatlar orqali haqiqiy narxidan 186 million so‘mga sun’iy ravishda oshirgan holda baholatib, non ishlab chiqarish sexi va savdo do‘koni qurish uchun 2 milliard so‘m kredit ajratilishiga erishib, ushbu mablag‘ni o‘zining shaxsiy ehtiyojlariga sarflab yuborib, o‘zlashtirgan.

Departamentning Oqqo‘rg‘on tuman bo‘limi tomonidan tergovga qadar tekshiruv o‘tkazilgan. Unda tumandagi “P.” MCHJ rahbari A.T. ATB “Mikrokreditbank”ning Oqqo‘rg‘on filialidan makaron mahsulotlari ishlab chiqarish uskunasini sotib olish uchun 750 million so‘m kredit ajratilishiga erishgan. Ushbu kredit mablag‘ini “A-K.” MCHJga o‘tkazish orqali naqdlashtirib, talon-toroj qilgan.

Shuningdek, Termiz tumanida “P.K.” xususiy korxonasi rahbari K.P. “Turonbank” ATB Termiz filialidan zamonaviy issiqxona qurish orqali limonchilik faoliyatini tashkil etish uchun ajratilgan 400 million so‘m kredit mablag‘ini o‘zi norasmiy ravishda rahbarlik qilib kelgan “K.B.” MCHJga soxta shartnoma asosida o‘tkazgan. Issiqxona tashkil etmasdan, talon-toroj qilgani aniqlangan.

Bundan tashqari, Jarqo‘rg‘on tumanida “N.Y.” MCHJ rahbari D.Q. “Ipoteka bank” ATIB Surxondaryo filialidan baliqchilik xo‘jaligini rivojlantirish maqsadida 300 million so‘m kredit ajratilishiga erishgan. Kredit mablag‘ini o‘zining shaxsiy ehtiyojlariga sarflab, talon-toroj qilgan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.