Сурхондарёда нон ишлаб чиқариш цехи ва дўкон қуриш учун ажратилган 2 млрд сўм кредитни ўзлаштирган тадбиркор ушланди

Ўзбекистоннинг турли ҳудудларида банк кредит маблағларини талон-торож қилган МЧЖ раҳбарлари аниқланди. Бу ҳақда Иқтисодий жиноятларга қарши курашиш департаменти хабар қилди.

Қайд этилишича, Бош прокуратура ҳузуридаги департаментнинг Шўрчи туман бўлими томонидан «Қишлоқ қурилиш банк» АТБ Шўрчи филиалининг мурожаатига асосан терговга қадар текширув ўтказилган. Унда, «К.Ж.» МЧЖ раҳбари Б.Э. гаров таъминоти сифатида қўйилган бино-иншоотларни сохта ҳужжатлар орқали ҳақиқий нархидан 186 миллион сўмга сунъий равишда оширган ҳолда баҳолатиб, нон ишлаб чиқариш цехи ва савдо дўкони қуриш учун 2 миллиард сўм кредит ажратилишига эришиб, ушбу маблағни ўзининг шахсий эҳтиёжларига сарфлаб юбориб, ўзлаштирган.

Департаментнинг Оққўрғон туман бўлими томонидан терговга қадар текширув ўтказилган. Унда тумандаги «П.» МЧЖ раҳбари А.Т. АТБ «Микрокредитбанк»нинг Оққўрғон филиалидан макарон маҳсулотлари ишлаб чиқариш ускунасини сотиб олиш учун 750 миллион сўм кредит ажратилишига эришган. Ушбу кредит маблағини «А-К.» МЧЖга ўтказиш орқали нақдлаштириб, талон-торож қилган.

Шунингдек, Термиз туманида «П.К.» хусусий корхонаси раҳбари К.П. «Туронбанк» АТБ Термиз филиалидан замонавий иссиқхона қуриш орқали лимончилик фаолиятини ташкил этиш учун ажратилган 400 миллион сўм кредит маблағини ўзи норасмий равишда раҳбарлик қилиб келган «К.Б.» МЧЖга сохта шартнома асосида ўтказган. Иссиқхона ташкил этмасдан, талон-торож қилгани аниқланган.

Бундан ташқари, Жарқўрғон туманида «Н.Я.» МЧЖ раҳбари Д.Қ. «Ипотека банк» АТИБ Сурхондарё филиалидан балиқчилик хўжалигини ривожлантириш мақсадида 300 миллион сўм кредит ажратилишига эришган. Кредит маблағини ўзининг шахсий эҳтиёжларига сарфлаб, талон-торож қилган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.