Samarqand viloyatining Payariq tumanida oltin moddali rudalarga noqonuniy ravishda ishlov berib kelgan shaxslar aniqlandi, deb xabar beradi viloyati IIB axborot xizmati.
Ma’lum qilinishicha, Davlat xavfsizlik xizmati Samarqand viloyat boshqarmasi hamda viloyat IIB xodimlari hamkorligida tezkor tadbir o‘tkazilgan. Tadbir davomida 43 yoshli E.A. va 25 yoshli L.Z. yashash xonadonlarida oltin moddali rudalarga ishlov berib kelgani aniqlangan. Ularning uyidan 525 kilogramm ruda toshlar, kukunlar hamda ikkita tegirmon uskunasi protsessual tartibda hujjatlashtirilgan.
Narpay tumanida yashovchi 53 yoshli B.N. va Paxtachi tumanida yashovchi 36 yoshli X.B. esa noqonuniy ravishda ohak mahsulotini ishlab chiqarish bilan shug‘ullanib kelayotgani aniqlangan hamda ashyoviy dalillar (4 dona ohak pechi, D-18 mm bo‘lgan jami 48 dona qo‘lbola “gorelka”lar) xolislar ishtirokida hujjatlashtirilgan.
Mazkur shaxslar tabiiy gazdan noqonuniy foydalanish oqibatida 440 million so‘m miqdorida zarar yetkazilgani ma’lum bo‘ldi.
Hozirda, yuqoridagi shaxslarga nisbatan tergovga qadar tekshiruv harakatlari olib borilmoqda.
Avvalroq Samarqandda noqonuniy ravishda oltin qazib olish bilan shug‘ullangan shaxslar ushlangani, Samarqandda tarkibida oltin bo‘lgan ruda toshlarini noqonuniy qazib olish bilan shug‘ullangan jinoiy guruh faoliyatiga chek qo‘yilgani to‘g‘risida xabar berilgandi.
Izoh (0)