Prezident Shavkat Mirziyoyev Farg‘ona shahrida ochilgan kasb-hunarga o‘qitish markazi faoliyati bilan tanishdi.
Janubiy Koreya xalqaro hamkorlik agentligi – KOICA bilan sheriklikda tashkil etilgan ushbu majmuada elektronika, axborot texnologiyalari, avtomobilsozlik, tikuvchilik, sartaroshlik-kosmetologiya kabi talab yuqori kasblar bo‘yicha mutaxassislar tayyorlanadi.
Markazga barcha zamonaviy uskuna va jihozlar Janubiy Koreyadan olib kelingan. O‘quv-mashg‘ulotlar ham ushbu mamlakat dastur va qo‘llanmalari asosida o‘tiladi. Buning uchun 5 nafar koreyalik murabbiy jalb etilgan. Ayni paytda 240 nafar kishi saboq olmoqda.
Davlat rahbari o‘quv jarayonlarini ko‘zdan kechirib, yoshlar va xotin-qizlar bilan suhbatlashdi.
“O‘qish, izlanishga hech qachon kech emas. Kelib, kasb o‘rganayotganingiz ertangi kuningizga befarq emasligingizdan dalolat. Biroz qiyin bo‘lar. Lekin o‘zingizni, farzandlaringiz kelajagini o‘ylasangiz, shunga qunt qiling. Qiyinchilik o‘tib ketadi, siz boylik yaratyapsiz”, — dedi Prezident.
Davlat rahbari koreyalik murabbiylar bilan ham suhbatlashib, ularga minnatdorlik bildirdi.
Hozirgacha mamlakatda bu kabi markazlar Toshkent, Samarqand va Shahrisabz shaharlarida bor edi. Farg‘onada tashkil yangi markaz esa vodiy viloyatlari aholisiga xizmat ko‘rsatadi. Uzoqdan kelib, kasb o‘rganuvchilar uchun yotoqxona ham barpo etilgan.
Mavzuga doir:
- “Hokim, sektor rahbarlari nima qilgan?” Prezident Farg‘onadagi sayyor qabullarda ko‘tarilgan muammolar haqida
- “Hech kim bizga aql o‘rgata olmaydi, bizning o‘z tanlagan yo‘limiz bor” — Shavkat Mirziyoyev
- “Qaysi hududga borsam ham oddiy insonlarni tinglab, haqiqiy holatni bilgim keladi” — Shavkat Mirziyoyev
Izoh (0)