2023–2024-yillarda O‘zbekistondagi maktablarda ma’nan eskirgan kompyuter sinflarini yangilash uchun 400 milliard so‘m mablag‘lar ajratiladi. Bu haqda “Xalq ta’limini rivojlantirishga oid qo‘shimcha chora-tadbirlar to‘g‘risida”gi prezident qarorida so‘z boradi.
Unga ko‘ra, 2023–2024-yillarda maktablarda ma’nan eskirgan kompyuter sinflarini yangilash bo‘yicha dasturni moliyalashtirish uchun respublika budjeti hisobidan 200 milliard so‘m, mahalliy budjetlar hisobidan 200 milliard so‘m miqdorda mablag‘lar ajratiladi.
Shuningdek 2022/2023-o‘quv yilidan boshlab 400 nafargacha o‘quvchisi bo‘lgan umumiy o‘rta ta’lim muassasalarida internet tezligini kamida 40 Mbit/soniya, o‘quvchilar soni 400 nafardan yuqori bo‘lganlarda – kamida 100 Mbit/soniya bo‘lishi ta’minlanadi. Internetga ulash uchun zarur mablag‘larni ajratish vazifasi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga topshirildi.
Avvalroq O‘zbekistonda maktab direktori lavozimiga nomzodlar faqat menejerlik sertifikatiga ega bo‘lgan shaxslar orasidan tanlab olinishi to‘g‘risida xabar berilgandi.
Izoh (0)