Chilonzordagi devorga chizilgan Chusovitina graffitisiga yubka “kiydirilgani” haqida xabar berilgandi. Gimnastikachi ushbu voqeaga o‘z munosabatini bildirdi.
Foto: Telegram
So‘zi avvalida sportchi ushbu graffiti chizilganidan xursand bo‘lganini aytib o‘tdi.
“Hurmatli do‘stlarim va muxlislarim! Men sizning har biringizni chuqur qadrlayman va hurmat qilaman hamda har qanday vaziyatda qo‘llab-quvvatlovchi so‘zlaringizni eshitishdan juda xursandman. Olimpiadada qatnashib, Yaponiyadan qaytib kelganimdan so‘ng, Chilonzor tumanidagi turar joy binolaridan birining fasadida muallifi @inkuzart bo‘lgan noodatiy art-obyekt paydo bo‘ldi. Bu men uchun, mening chiqishlarim va taqdirimga befarq bo‘lmagan barcha uchun yoqimli bo‘ldi. Bilaman, bu rasm katta rezonansga sabab bo‘ldi va yurtdoshlarimiz tomonidan juda ko‘p ijobiy fikrlar oldi”, — deydi u.
Sportchining aytishicha, avvalroq graffitiga zarar yetkazilgan.
“Afsuski, jamiyatimizda hali ham davlatimizning turli sohalarida, xususan, san’at va sportda amalga oshirilayotgan bunyodkorlik va islohotlarga tor fikr bilan qaraydigan fuqarolar ham uchrab turibdi. Aftidan, ular uchun yagona quvonch olib keluvchi narsa bu jamoat ahamiyatiga ega bo‘lgan obyektlarga zarar yetkazish hisoblanadi. Men rasmim bilan qilingan ishlarni faqat vandalizm deb atashim mumkin”, — deydi Oksana.
Chusovitina Toshkent shahar hokimligi zarar yetkazilgan graffitiga yubka qo‘shib qo‘yishga majbur bo‘lganini ma’lum qildi.
“Menga shahar hokimligidan telefon qilib, bo‘lgan voqeani aytishdi. Shundan so‘ng hokimiyatdagilar kiyimimga yubka qo‘shib, rasmning o‘zgartirilgan qismlarini tuzatishga qaror qilishganini ma’lum qilishdi”, — deydi sportchi.
Posti oxirida graffitiga zarar yetkazgan fuqarolarga o‘z-o‘zini rivojlantirishga intilishlarini, ko‘proq mumtoz va ilmiy adabiyotlarni o‘qishlarini, sport bilan shug‘ullanishlarini hamda ma’naviy jihatdan yuksalishlarini tilagan.
Strit-artlarga qilingan “hujumlar”
2021-yilning sentabr boshida @inkuzart O‘zbekiston avtomobil bozoridagi monopoliyaga bag‘ishlangan strit-art chizgandi. Unda mashina uchun uzun navbat va navbat boshida qizil shapkali inson tasvirlangandi. Keyinroq ushbu tasvir to‘liq o‘chirib tashlangan, poytaxt hokimligi va “O‘zavtosanoat” bu ishga aloqasi yo‘qligini ma’lum qilgan edi. Noyabrda esa ko‘cha rassomining Toshkentda benzin narxi oshishiga bag‘ishlangan strit-art o‘chirib tashlandi. 2022-yilning 18-fevral kuni esa Inkuzart’ga tegishli turli formulalar bilan devorga chizilgan Albert Eynshteynning portreti bo‘yab tashlangan. Chilonzor tuman hokimligi strit-artning o‘chirilishiga tuman hokimining buyrug‘i emas, mahalla faollari sababchi bo‘lganini ma’lum qilgan.
