Van Damm, Bochelli, Vuychich va jismoniy nuqsoniga qaramay muvaffaqiyatga erishgan boshqa yulduzlar (foto)

Bu odamlar boshqalarga o‘xshamasa ham muvaffaqiyatga erishish va ba’zi kamchiliklariga qaramasdan baxtli bo‘lish mumkinligini allaqachon hammaga isbotlagan.

Xavyer Botet

Ispaniyalik aktyor Morfan sindromi bilan tug‘ilgan. Uning bo‘yi baland (201 sm) va ayni paytda juda ozg‘in. Bunday xususiyatlari bilan Xaver ko‘pincha qo‘rqinchli filmlarda rol ijro etadi, fantastik personajlarni jonlantirishga ham tez-tez taklif qilinadi.

Loren Potter

“Xor” seriali yulduzi Daun sindromi bilan tug‘ilgan. U bolaligidan aktrisa bo‘lishni xohlagan. Nihoyat orzusi amalga oshib, 18 yoshida olti fasl davom etgan “Xor” serialida quvnoq Bekki Jekson rolini o‘ynadi. U boshqalar ham Daun sindromli odamlarni o‘zlariga teng ko‘rishlarini orzu qiladi.

Barbara Streyzand

Taniqli aktrisa, qo‘shiqchi, prodyuser — Barbara Streyzandning eshitish qobiliyati past ekanligini ko‘pchilik bilmaydi. Taniqli kino yulduz davolab bo‘lmaydigan kasallik bo‘lgan tinnitusga chalingan — bolaligidan qulog‘ida shovqin bor. Yoshligida qulog‘idagi shovqindan qutulish uchun boshiga ro‘mol o‘rab yurgan. Streyzand yoshligidanoq eshitish moslamasida yuradi, garchi omma oldida taqmasa ham.

Jan-Klod Van Damm

Jang san’ati yulduzining ikkala qulog‘i ham deyarli eshitmaydi. Ko‘rsatuvlardan birida aktyor eshitish testidan o‘tadi, unda ikkala qulog‘ida ham yuqori chastotali eshitish qobiliyati yo‘qolgani ma’lum bo‘ladi. Van Dammning o‘zi anchadan beri bir nechta odamning bir vaqtning o‘zida suhbatini farq qilolmasligini aytadi, shuning uchun u kim bilan bo‘lsa ham yakkama-yakka gaplashishni afzal ko‘radi.

Piter Dinkleyj

“Taxtlar o‘yini” yulduzlaridan biri pakanalikka olib keladigan axondroplaziya genining tashuvchisi hisoblanadi. Piterning ota-onasi va ukasi odatiy bo‘yli odamlardir. Aktyorning bo‘yi esa 135 sm. Shuning uchun aktyorlik maktabini tugatgan Dinkleyj laprekun va boshqa mavjudotlarni o‘ynashga shoshilmadi, bunday rollar odatda mitti aktyorlarga taklif qilinadi. U yulduzli onlarini kutdi. Piter “Taxtlar o‘yini” serialida rol o‘ynash taklifini olganida, bir nechta taniqli aktyorlik ishlari va turli mukofotlarga sazovor bo‘lgandi. Piter o‘rta bo‘yli aktrisa Erika Shmidtga uylangan. Er-xotinning bir qizi va bir o‘g‘li bor. Otasining baxtiga uning genlari bolalariga o‘tmagan.

Uorvik Devis

Aktyor “Garri Potter” muxlislariga yaxshi tanish, chunki u filmda professor Flitvik rolini o‘ynagan. Bu roldan tashqari uning filmografiyasida o‘nlab asarlar mavjud. Mittilikdan aziyat chekkan Devis bo‘yi 120 sm dan oshmagan aktyorlar uchun kasting bo‘layotganini eshitgan buvisining yordami bilan aktyor bo‘lgan. Buvisi sabab bo‘yi 107 sm bo‘lgan Uorvik Devis yulduzga aylanadi.

Mett Freyzer

Aktyor fokomeliya — oyoq-qo‘llarning rivojlanmasligi kasalligiga chalingan. Bunga 1950—1960-yillarda deyarli barcha homilador ayollarga buyurilgan tinchlantiruvchi talidomid preparati sabab bo‘lgan. Bir necha yil o‘tgachgina, bu dori homilani malformatsiyaga olib kelishi ma‘lum bo‘ladi. Ammo onasi farzandini boshqalardan farq qilmasligini uqtirgan va Mett o‘ziga ishongan odam bo‘lib ulg‘aygan. Qo‘llari kalta bo‘lishiga qaramay, u rok guruhida gitara chaladi, shuningdek, 2012-yilda Paralimpiya o‘yinlarining ochilishi va yopilishi marosimida chiqish qilgan.

Rey Charlz

Afsonaviy amerikalik musiqachi yetti yoshida stress tufayli ko‘r bo‘lib qolgan: ukasi ko‘z o‘ngida cho‘kib ketgandan so‘ng Reyning ko‘rishida muammolar paydo bo‘ladi va ikki yil ichida u ko‘rish qobiliyatini butunlay yo‘qotadi. Bu uning mashhur musiqachi bo‘lishi, pianino, organ, saksafon, trombon va klarnet chalishi va 17 ta “Gremmi” mukofotini olishiga to‘sqinlik qilmadi.

Stiv Uander

Afsonaviy qo‘shiqchi va musiqachi muddatidan oldin tug‘ilgan. Tug‘uruqxonada boksda yotgan chaqaloqqa xatolik sabab juda ko‘p kislorod berilgan va bu uning ko‘r bo‘lishiga olib kelgan. Uander bir nechta asboblarni ham mukammal chalishni biladi, yigirmadan ortiq albomi bor va 25 ta “Gremmi” mukofotini olgan.

Andrea Bochelli

Dunyoga mashhur tenor bolaligida ko‘r bo‘lib qoladi. Tug‘ilishdanoq unda ko‘rish bilan bog‘liq muammolar bo‘lgan, ammo fojiali voqea hamma narsani hal qiladi. Andrea 12 yoshida o‘yin vaqtida boshiga futbol to‘pi uriladi, zarbadan u butunlay ko‘r bo‘lib qoladi. Yigitcha yoshligidan shunchaki emas, balki zo‘r qo‘shiqchi bo‘lishni orzu qilgan. U vokalni professional tarzda o‘rgangan, ammo 1992-yilda Luchano Pavorotti bilan tanishishi uning keyingi taqdirini hal qilgan. Bochellida haqiqiy iste’dodni aynan u ko‘ra olgan.

Bugungi kunga qadar Andrea Bochelli 15 ta albom yozgan va Gollivudning Shon-sharaf xiyobonida o‘z yulduziga ega. Hozir u ikkinchi turmushi bilan uch nafar farzandni tarbiyalamoqda.

Nik Vuychich

Ehtimol, Nik nima bo‘lishidan qat’i nazar, qanday qilib mashhur bo‘lishingiz mumkinligining eng yorqin misolidir. Avstraliyalik notiq, filantrop va yozuvchi tetraameliya sindromi bilan tug‘ilgan, bu to‘rtta a’zoning ham yo‘qligiga olib keladigan noyob irsiy kasallik. Aynan shu kasallik uni yoshlarga o‘zini o‘zi qabul qilishning muhimligi haqida ma’ruza qilishiga sabab bo‘lgan. Hozirda Nik Vuychich baxtli turmush qurgan va to‘rtta sog‘lom farzandi bor.