Navoiy va Namangan viloyatlarida yer maydonlarini noqonuniy ravishda sotishga uringan shaxslar ushlandi

Navoiy va Namangan viloyatlarida yer maydonlarini sotmoqchi bo‘lgan shaxslar ushlandi, deb xabar beradi Bosh prokuratura huzuridagi departament.

Xususan, departament, DXX va IIVning Navoiy viloyati boshqarmalari tomonidan o‘tkazilgan tezkor tadbirda fuqaro G‘.E. Karmana tumani “Talqoq” MFY hududidan fuqaro B.M.ga maishiy xizmat ko‘rsatish binosini qurish uchun ajratilgan (tasarruf etish huquqisiz) 4 sotix yer maydonini boshqa bir fuqaro X.ga sotishga kelishgani aniqlangan. U kelgusida tanishlari orqali uy-joy qurish uchun hujjatlarini rasmiylashtirib berishni va’da qilib, oldindan kelishilgan 180 million so‘mni olgan vaqtida ashyoviy dalillar bilan ushlangan.

Shuningdek, yana bir tezkor tadbirda fuqarolar Q.R. va A.N. Xatirchi tumanidagi “B.K.” fermer xo‘jaligiga qarashli 35 sotix va o‘zboshimchalik bilan egallab olingan 55 sotix yer maydonini internet saytlari orqali sotishga e’lon bergani ma’lum bo‘lgan. Ular jami 90 sotix yer maydonini fuqaro A.ga 180 million so‘mga sotishga kelishib, oldindan 130 million so‘mni olgan vaqtida ashyoviy dalillar bilan qo‘lga olingan.

Namangan viloyatining Uychi tuman bo‘limi tomonidan o‘tkazilgan tezkor tadbirda esa fuqaro A.D. fuqaro M.A.ga “Tepasaroy” MFY hududida joylashgan 10 sotix hamda A.D.ning o‘ziga ajratilgan 11 sotix yer maydonini boshqa bir fuqaro Q.ga 23,1 ming AQSH dollariga sotishga kelishib, oldindan 15 ming dollarni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Toshkent viloyatida 2,4 gektar yerni qariyb 1 mln dollarga sotmoqchi bo‘lgan shaxslar qo‘lga tushgani to‘g‘risida xabar berilgandi.