Навоий ва Наманган вилоятларида ер майдонларини сотмоқчи бўлган шахслар ушланди, деб хабар беради Бош прокуратура ҳузуридаги департамент.
Хусусан, департамент, ДХХ ва ИИВнинг Навоий вилояти бошқармалари томонидан ўтказилган тезкор тадбирда фуқаро Ғ.Э. Кармана тумани «Талқоқ» МФЙ ҳудудидан фуқаро Б.М.га маиший хизмат кўрсатиш биносини қуриш учун ажратилган (тасарруф этиш ҳуқуқисиз) 4 сотих ер майдонини бошқа бир фуқаро Х.га сотишга келишгани аниқланган. У келгусида танишлари орқали уй-жой қуриш учун ҳужжатларини расмийлаштириб беришни ваъда қилиб, олдиндан келишилган 180 миллион сўмни олган вақтида ашёвий далиллар билан ушланган.
Шунингдек, яна бир тезкор тадбирда фуқаролар Қ.Р. ва А.Н. Хатирчи туманидаги «Б.К.» фермер хўжалигига қарашли 35 сотих ва ўзбошимчалик билан эгаллаб олинган 55 сотих ер майдонини интернет сайтлари орқали сотишга эълон бергани маълум бўлган. Улар жами 90 сотих ер майдонини фуқаро А.га 180 миллион сўмга сотишга келишиб, олдиндан 130 миллион сўмни олган вақтида ашёвий далиллар билан қўлга олинган.
Наманган вилоятининг Уйчи туман бўлими томонидан ўтказилган тезкор тадбирда эса фуқаро А.Д. фуқаро М.А.га «Тепасарой» МФЙ ҳудудида жойлашган 10 сотих ҳамда А.Д.нинг ўзига ажратилган 11 сотих ер майдонини бошқа бир фуқаро Қ.га 23,1 минг АҚШ долларига сотишга келишиб, олдиндан 15 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкент вилоятида 2,4 гектар ерни қарийб 1 млн долларга сотмоқчи бўлган шахслар қўлга тушгани тўғрисида хабар берилганди.
Мавзуга доир:
Изоҳ (0)