Ijtimoiy tarmoqda avtobus ag‘darilib ketgani tasvirlangan video tarqaldi. IIV YHXX holat yuzasidan rasmiy ma’lumot berdi.
Ma’lum qilinishicha, 3-may kuni soat 10:00 larda Navoiy viloyatining Qiziltepa tumani hududidan o‘tuvchi 4R-65 avtomobil yo‘lining 23–24-kilometrlari oralig‘ida 49 yoshli haydovchi K.O‘. Yutong rusumli avtobusda harakatlanayotib, ehtiyotsizligi oqibatida rul boshqaruvini yo‘qotgan va avtobus yo‘l chetiga ag‘darilgan.
Oqibatda 5 nafar yo‘lovchi tan jarohati bilan shifoxonaga yotqizilgan. Viloyat IIB axborot xizmati rahbari O‘ktam Usmonovning “Daryo” so‘roviga asosan ma’lum qilishicha, avtobusda jami 25 nafar yo‘lovchi bo‘lgan.
Ushbu YTH yuzasidan Navoiy viloyati IIB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Andijonda Nexia-3 bilan to‘qnashgan Tico ikkiga bo‘linib ketgani, Farg‘onada Tracker va Gentra to‘qnashuvi oqibatida yo‘lovchi halok bo‘lgani to‘g‘risida xabar berilgandi.
Izoh (0)