“Andijonda to‘y bo‘lsa yor-yordan oldin “Andijon polkasi” aytiladi” — senator Tolibjon Madumarov

“Andijon polkasi” raqsini YUNЕSKO nomoddiy madaniy meros ro‘yxatiga kiritish tashabbusi juda to‘g‘ri tashabbus. Bu haqda Senatning Mudofaa va xavfsizlik masalalari qo‘mitasi raisi o‘rinbosari Tolibjon Madumarov “Daryo” muxbiri bilan suhbatda aytdi.

Uning aytishicha, 2022 yil “Andijon polkasi” raqsi yaratilganiga 100 yil bo‘ldi.

Bu raqs shu darajada zavqliki, Xorazmning lazgisidan ham o‘tib ketadi. Inson tanasining barcha joyi qimirlab o‘ynaladi bu raqsda. Hammaning o‘z brendi, orzusi bo‘ladi. Andijonda to‘y bo‘lsa, albatta, yor-yordan oldin “Andijon polkasi” aytiladi. Men o‘zim andijonlikman. Bu raqsni yoqtirib, biror tadbir bo‘lsa o‘ynayman. “Andijon polkasi”ga hamma o‘ynashi mumkin. Bu juda to‘g‘ri tashkil etilgan narsa, — deydi u.

Avvalroq Andijon viloyati hokimi Shuhrat Abdurahmonov barcha andijonliklarga topshiriq berib, o‘zini haqiqiy andijonlikman deb bilganlar jamoasi, hamkasblari bilan har kuni “Andijon polkasi”ga raqsga tushishni odat tusiga aylantirishi kerakligini buyurgani haqida xabar berilgan edi.

Viloyat hokimi o‘rinbosari Azizxon Maxsumov imzolagan xabarnomada aytilishicha, 25 apreldan boshlab viloyatda “Andijon polkasi” oyligi e’lon qilingan.

Shundan so‘ng ijtimoiy tarmoqlarda ushbu raqsga o‘ynayotgan fuqarolarning videolavhalari tarqaldi. Jumladan, Qo‘rg‘ontepa tumanidagi tibbiyot texnikumi, pedagogika kolleji talabalari, tumandagi 1-son kasb-hunar maktabining o‘quvchilari “Andijon polkasi” sadolari ostida raqsga tushishgan.

Madaniyat vaziri Ozodbek Nazarbekov ham bu tashabbusni qo‘llab-quvvatlashini aytgan edi.