Markaziy bank xorijiy valyutalarning o‘zbek so‘miga nisbatan 5-mayda amalda bo‘ladigan qiymatini belgiladi.
Unga ko‘ra, rubl so‘mga nisbatan 157,52 so‘mga baholanmoqda. Bu esa tarixdagi eng yuqori ko‘rsatkichdir.
Oxirgi marta rubl 2020-yilning yanvarida hozirgi qiymatiga eng yaqin kelgan edi. O‘shanda rublning so‘mga nisbatan qiymati 156,59 so‘mgacha ko‘tarilgan.
Rublning so‘mga nisbatan 29-apreldagi qiymati 2022-yil uchun eng yuqorisi bo‘ldi.
Rubl nega oshib bormoqda
“Daryo” suhbatlashgan ekspertlar buning uchta asosiy sababini aytib o‘tishdi.Birinchidan, Rossiyadan pul chiqib ketishi sezilarli darajada kamaydi, natijada xorijiy valyutaga bo‘lgan talab pasaydi.
Bunga boshqa davlatlarga oyiga 10 000 dollardan ortiq pul o‘tkazmalarining taqiqlanishi, valyuta ayirboshlash uchun brokerlarning majburiy komissiyalari 12 foiz miqdorda belgilanishi, fuqarolarga naqd valyuta sotish cheklanishi sabab bo‘ldi.
Ikkinchidan, Rossiya eksportchilarni valyuta tushumining 80 foizini sotishga majbur qildi, bu esa valyutaning kirib kelishiga yordam berdi. Rossiya tovarlari eksporti ancha yuqori darajada saqlanib qoldi.
Uchinchidan, kompaniyalarga qo‘yilgan cheklovlar va ta’minot zanjirlarining buzilishi Rossiyada importni keskin kamaytirdi — chet el valyutasiga kamroq tovarlar sotib olinayotganligi sababli bu unga talabni kamaytirdi.
Xuddi shunday holat 2020-yilning ikkinchi choragida pandemiya davrida ham kuzatilgan, o‘shanda importning pasayishi rubl kursini barqarorlashtirgan edi.
Izoh (0)