Shavkat Mirziyoyev 29-aprel kuni o‘tkazilgan videoselektor yig‘ilishida bir qator mahbuslarni afv etish bo‘yicha farmonni imzoladi. Bu haqda prezident matbuot kotibi xabar qildi.
“Ramazon oyi – saxiylik, mehr-oqibat va bag‘rikenglik oyidir. Bu qutlug‘ ayyomda mehr-shafqatli, kechirimli bo‘lish hammamiz uchun ham farz, ham qarz”, — degan davlat rahbari.
Shu munosabat bilan, Ramazon hayiti arafasida prezident adashib jinoyatga qo‘l urgan, lekin aybini chuqur anglab, tuzalish yo‘liga qat’iy o‘tgan 65 nafar fuqaroni afv etish bo‘yicha farmonni imzolagan.
Eslatib o‘tamiz, Shavkat Mirziyoyev yanvar oyi oxirida “Ozodlikdan mahrum etish jazosini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida”gi farmonni imzolagan. Unga ko‘ra, 44 nafar mahbus muddatidan avval ozod etiladi.
Prezident 2021-yilgi Ramazon hayiti munosabati bilan 100 nafar mahbusni afv etgan edi.
Bundan avval Shavkat Mirziyoyev Konstitutsiya kuni arafasida 182 nafar, O‘zbekiston mustaqilligining 30 yilligi arafasida 215 nafar hamda Navro‘z bayrami arafasida 140 nafar mahkumni afv etgani haqida xabar qilingan.
Izoh (0)