“O‘zini haqiqiy andijonlikman deb bilganlar Andijon polkasiga raqsga tushishni odat qilsin”. Shuhrat Abdurahmonovdan andijonliklarga yangi topshiriq berildi

Andijon viloyati hokimi Shuhrat Abdurahmonov barcha andijonliklarga topshiriq berib, o‘zini haqiqiy andijonlikman deb bilganlar jamoasi, hamkasblari bilan har kuni “Andijon polkasi”ga raqsga tushishni odat tusiga aylantirishi kerakligini buyurdi. Bu haqda “Daryo” muxbiri xabar berdi.

Viloyat hokimi o‘rinbosari Azizxon Maxsumov imzolagan xabarnomada aytilishicha, viloyat hokimi Shuhrat Abdurahmonov raisligida 2022-yilning 25-aprel kuni o‘tkazilgan hokimlik soatida viloyatda “Andijon polkasi” oyligi o‘tkazilishi kerakligi haqida topshiriq berilgan.

“‘Andijon polkasi’ kuyi yaratilganining 100 yilligi ‘Andijon polkasi’ raqs ansambli tashkil etilganining 65 yilligi munosabati bilan viloyatdagi barcha tashkilot va muassasa rahbarlari, o‘zini haqiqiy andijonlikman deb bilganlar jamoasi hamkasblari bilan har kuni ‘Andijon polkasi’ga raqs tushishni odat qilishlari kerak. 25-apreldan boshlab viloyatda ‘Andijon polkasi’ oyligi e’lon qilinadi”, — deyiladi viloyat hokimi o‘rinbosari imzolagan xabarnomada.

Xabarnomada, shuningdek, mazkur tadbir chellenj va fleshmoblar tashkil etish orqali ommalashtirilishi lozimligi ta’kidlanadi.

Viloyat hokimligi mazkur tadbirlar nazoratga olinishini ma’lum qilib, o‘tkazilgan tadbirlar haqida haftaning har juma kuni soat 15:00 ga qadar fotoalbom ko‘rinishida axborot berish lozimligini qo‘shimcha qiladi.

“Daryo” manbasiga ko‘ra, Shuhrat Abdurahmonov hokimlik soatida har bir millat va hududning raqsi bo‘lgani kabi andijonliklarga xos chapanilikni o‘zida mujassam etgan “Andijon polkasi” viloyatning tashrif qog‘ozi bo‘lishi kerakligini aytgan. Shuningdek, hokim ushbu raqsni UNESCO’ning nomoddiy ma’daniy meros obyektlari ro‘yxatiga kiritish borasidagi harakatlar haqida ham ma’lumot bergan.