O‘zbekistonda Ramazon oyining uchinchi haftasida amalga oshirilgan xayriyalar to‘g‘risida ma’lumot berildi

O‘zbekistonda Ramazon oyining uchinchi haftasida mingga yaqin xonadonlarga 210,38 million so‘mlik oziq-ovqat mahsulotlari tarqatildi. Bu haqda “Vaqf” xayriya jamoat fondi axborot xizmati rahbari Saidabror Umarov AOKAda o‘tkazilgan brifingda ma’lum qildi.

Saidabror Umarovning ma’lum qilishicha, ijtimoiy ko‘makka muhtoj, nochor fuqarolar shuningdek, boquvchisi yo‘q oila hamda nogironligi bor bo‘lgan aholi vakillarini moddiy qo‘llab quvvatlash va ularni zaruriy oziq-ovqatlar bilan ta’minlashga e’tibor qaratilmoqda.

Jumladan, “Ramazon tuhfasi” loyihasi doirasida:

• respublika bo‘ylab mingga yaqin xonadonlarga 210 million 380 ming so‘mlik oziq-ovqat mahsulotlari;
• moddiy ko‘makka muhtoj xonadonlar va nogironligi bor bo‘lgan aholi vakillaridan 128 nafariga 149 million 300 ming so‘mlik pul mablag‘lari tarqatilgan.

Oy boshidan hozirgacha esa respublika bo‘ylab to‘rt yarim mingga yaqin xonadonlarga 918 million 270 ming so‘mlik oziq-ovqat mahsulotlari, moddiy ko‘makka muhtoj 423 nafar shaxslarga esa 570 million 950 ming so‘mlik pul mablag‘lari xayriya qilingan.

Eslatib o‘tamiz, O‘zbekistonda Ramazon oyining ilk haftasida uch mingga yaqin xonadonlarga 473,93 million so‘mlik oziq-ovqat mahsulotlari tarqatilgandi.

Ma’lumot uchun, O‘zbekiston prezidentining 2018-yil 16-apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi farmoniga muvofiq O‘zbekiston musulmonlari idorasi huzurida “Vaqf” xayriya jamoat fondi tashkil etilgan. “Vaqf” xayriya jamoat fondining asosiy vazifalari fuqarolarning diniy, ma’naviy va intellektual salohiyatini oshirishga qaratilgan tashabbuslarini qo‘llab-quvvatlash, milliy va diniy qadriyatlarimizni asrab-avaylash, masjidlar va diniy ta’lim muassasalarining binolarini qurish, ta’mirlash, rekonstruksiya qilish, obodonlashtirish, moddiy-texnik bazasini mustahkamlashdan iborat.