Яқин ўтмишнинг энг номдор боксчиларидан бири Виталий Кличко оғир вазн тоифасида уч карра жаҳон чемпиони бўлгани яккакураш мухлисларига яхши маълум. Виталий фаолияти давомида 47 та жанг ўтказиб, шуларнинг 45 тасида ғалаба қозонган (41 та нокаут), 2 тасида эса мағлубиятга учраган, шу билан бирга у бирор марта нокдаун ҳолатига тушмаган.
Виталий Кличко WBO (1999—2000), The Ring журнали (2004—2005) ва WBC (2004—2005; 2008—2013) талқинларига кўра жаҳон чемпиони ҳамдир. Шунингдек, у дебютантдан жаҳон чемпионигача бўлган йўлга энг кам раунд сарфлаш бўйича рекордчи ҳисобланади. Бундан ташқари, Виталий бокс тарихида фаолияти давомида муддатидан олдин қозонилган ғалабалар бўйича иккинчи энг яхши кўрсаткичга эга (87,2%). Бу кўрсаткич бўйича украиналик боксчи енгилмас Рокки Марчианодан орқада. Кличко 2018 йилда бокс шон-шараф залига киритилган. Қуйида эса Кличконинг фаолиятидаги асосий жанглар ҳақида сўз юритилади.Виталий Кличко (37-2) — Крис Арреола (27-0), 2009 йил
2009 йилда 38 ёшли Виталий АҚШдаги сўнгги жангини ўтказади, унга мезбон Крис Арреола рақиблик қилади. Ўшанда 28 ёшли Арреола WBC камари учун мажбурий даъвогар бўлиб турганди ва Американинг навбатдаги умиди эди.
Ушбу жанг олдидан мағлубиятга учрамаган Арреола дастлабки раундларда тажрибали рақибининг зарбаларидан қочиб, олдинга ўтишга муваффақ бўлади. Кличко эса рингда кўпроқ иккинчи рақам сифатида ишлайди. Гарчи чидамлилик кўрсатиб келган бўлса ҳам, жанг давомида Крис украиналикнинг кўплаб зарбаларини ўтказиб юборади. Кличко жангни тўлиқ ўз назоратига олади ва қарши ҳужумлардан муваффақиятли фойдаланади. Ўнинчи раундга келиб, америкаликнинг ғалаба қозониш имконияти деярли нолга тенглиги маълум бўлади. Арреоланинг мураббийлари ўн биринчи раунд бошланишини кутмасдан ҳакамдан жангни тўхтатишни сўрайди – рефери америкаликнинг бурчагига бориб, Криснинг ҳолатини баҳолаб, жангни тўхтатишга қарор қилади.
Виталий Кличко (34-2) — Дэнни Уильямс (32-3), 2004 йил
Виталий ушбу жангда WBC камарини илк марта ҳимоя қилади. Бу қарама-қаршиликда унга афсонавий Майк Тайсон рақиблик қилиши мумкин эди. Бироқ «Темир Майк» сенсацион тарзда 4-раундда Дэнни Уильямсга нокаут билан ютқазиб қўяди, шу боис Кличкога қарши айнан британиялик рингга кўтарилади.
Томонлар ажойиб жанг кўрсатиб беради. Дэнни биринчи раунддаёқ Виталийнинг узоқ давом этган сериясидан сўнг нокдаунга тушиб қолади. Учинчи раунд якунида Кличко британияликни ажойиб апперкоти билан навбатдаги нокдаунга жўнатади. Аммо Уильямс таслим бўлмайди ва жанг ўртасида ҳатто вазиятни ўнглашга ҳам муваффақ бўлади. Бироқ 7 ва 8-раундларда яна нокдаунга учрайди, шундан кейин ҳакам жангни тўхтатади.
Леннокс Льюис (40-2-1) — Виталий Кличко (32-1), 2003 йил
Ушбу афсонавий жанг ҳақида қанча гапирилса ҳам кам. «Юз марта эшитгандан, бир марта кўрган афзал» деган ибора айнан мана шу баҳсга атаб айтилгандек. Ушбу драматик тўқнашувда томошабинлар том маънода ҳамма нарсага гувоҳ бўлади: нокаут ёқасидаги фаворит, даъвогарнинг даҳшатли жароҳатлари ва зарбалар ёмғири. Айнан мана шу жанг туфайли Виталий Қўшма Штатларда ўзи учун ном қозонган ва юз минглаб мухлисларни ўзига ром этган.
Аммо афсуски, жанг Виталийнинг ғалабаси билан якунланмайди, шу боис бу жанг мазкур рўйхатда 3-ўрин билан чекланди.
Жангга Льюиснинг IBO, WBC ва The Ring камарлари қўйилади. 3-раундга келиб, Виталийнинг қоши ёрилиб кетади. Айнан мана шу жароҳат 6-раундга келиб, жангнинг тўхтатилишига олиб келади. Леннокс техник нокаут билан ғалаба қозонади. Аммо жанг тўхтатилаётган вақтда Кличко очколар ҳисобида олдинда бораётган бўлган. Жангдан сўнг Льюис Кличкога реванш жангини беришга ваъда беради, аммо Леннокс орада фаолиятини якунлайди ва реванш ўтказилмайди.
Виталий Кличко (35-2) — Семюел Питер (30-1), 2008 йил
Виталий бу жанггача турли жароҳатлар туфайли деярли 4 йил давомида рингга чиқмаганди. Шу сабабли WBC йўналиши бўйича жаҳон чемпиони бўлган ўша пайтдаги даҳшатли Самюэль Питер билан дуэлга киришиш жуда хавфли ҳаракат бўлиб туюлганди.
Шунга қарамай Кличко барча хавотирларни йўққа чиқаради. 8 раунд давомида, то Питер жангни давом эттиришдан бош тортмагунча, Кличко унга тинчлик бермайди.
37 ёшида, 4 йиллик танаффусдан кейин амалдаги чемпион устидан бундай устунлик, ҳақиқатан ҳам жуда қимматлидир.
Виталий Кличко (33-2) — Корри Сандерс (39-2), 2004 йил
Сандерс Виталийдан олдин унинг укаси Владимир Кличко билан жанг қилиб, уни мағлубиятга учратганди.
Виталий билан эса нақ уч марта тўқнаш келади. Улар ўртасидаги айнан сўнгги жанг рўйхатга якун ясаб беради. Ғолиб вакант қолган WBC ва The Ring камарларини қўлга киритарди.
Биринчи раунд том маънода триллер каби ўтади, Корри Виталийни қулатишига ҳам бир бахя қолади. Иккинчи ва учинчи раундларда ҳам Сандерс ўз услубида — чап зарбаси билан бир неча бор муваффақиятли қарши ҳужумларга ўтади, бироқ Кличко ҳар сафар ишончли ҳаракат қилар ва ўнг томондан аниқ зарбалар йўлларди. Тўртинчи раунддан кейин жанг Сандерсни услубий жиҳатдан мағлуб этган Виталийнинг катта устунлиги билан ўтади. Саккизинчи раундга келиб эса ҳакам Коррини рақибига қаршилик кўрсата олмайди деб ҳисоблаб, Кличконинг техник нокаут билан ғалабасини қайд этади.
Изоҳ (0)