Vazirlar Mahkamasining “2022— 2026-yillarda Qoraqalpog‘iston Respublikasi hududlarini kompleks ijtimoiy-iqtisodiy rivojlantirish va aholi turmush darajasini yanada yaxshilashga doir qo‘shimcha chora-tadbirlar to‘g‘risida”gi qarori qabul qilindi, deb xabar beradi Norma.
Hujjat bilan quyidagilar tasdiqlangan:
- Aholini qiynab kelayotgan mavjud muammolarni tezkor bartaraf etishga qaratilgan hamda amaliy tadbirlarni o‘z ichiga olgan “yo‘l xaritasi”;
- Qoraqalpog‘iston Respublikasi shahar va tumanlarining ixtisoslashuvi, “o‘sish nuqtalari” va “drayver sohalari”;
- Sanoat, qishloq xo‘jaligi va xizmat ko‘rsatish sohalarini rivojlantirish bo‘yicha investitsiya loyihalarining yig‘ma parametrlari;
- 2022-yilda Qoraqalpog‘iston Respublikasida muhandislik-kommunikatsiya, ishlab chiqarish va xizmat ko‘rsatish infratuzilmasini rivojlantirish hamda ijtimoiy soha obyektlarini qurish, rekonstruksiya qilish va ta’mirlash bo‘yicha kompleks tadbirlar;
- Qoraqalpog‘iston Respublikasining shahar va tumanlarida ijtimoiy va ishlab chiqarish infratuzilmasini rivojlantirish bo‘yicha shakllantirilgan istiqbolli loyihalarning manzilli ro‘yxati.
Hujjat Qonun hujjatlari ma’lumotlari milliy bazasida e’lon qilingan va 2022-yil 5-apreldan kuchga kirdi.
Eslatib o‘tamiz, 9-mart kuni Shavkat Mirziyoyev Qoraqalpog‘istonda amalga oshiriladigan investitsiya loyihalari taqdimoti bilan tanishgandi. Taqdimotda, muhandislik va yo‘l infratuzilmasini rivojlantirish, mahalla va ovullarda turmush sharoitlarini yaxshilash, aholi bandligini ta’minlash bo‘yicha olib borilayotgan ishlar haqida ma’lumot berilgan.
Ma’lum qilinishicha, 2020-yili Qoraqalpog‘istonda umumiy qiymati 436 million dollarlik 712 ta loyiha amalga oshirilib, 4 ming 300 dan ziyod ish o‘rni yaratilgan. 2020-yilning yanvar—fevral oylarida esa 52 ta loyiha bajarilib, 300 dan ortiq kishining bandligi ta’minlangan.
Izoh (0)