Ijtimoiy tarmoqlarda Toshkent metropolitenining poyezdi yarim soatdan beri to‘xtab qolgani aytilayotgan xabarlar tarqaldi. “Toshkent metropoliteni” davlat unitar korxonasi holatga izoh berdi.
Ma’lum qilinishicha, 7-aprel kuni soat 09:30 lar atrofida “Paxtakor” metro bekatida 15-sonli harakat tarkibida mashinist tomonidan nosozlik aniqlangan va xavfsizlik choralarini ko‘rish maqsadida yo‘lovchilar vagondan tushirilgan.
Shuningdek, navbatdagi 18-sonli marshrut ham yo‘lovchilarni “Paxtakor” metro bekatida tushirib, 15-elektropoyezdni texnik ko‘rikdan o‘tkazish uchun depoga tomon harakatlanishida ko‘maklashgan.
“Soat 09:37 dan boshlab poyezdlar harakati doimiy jadval asosida amalga oshirilmoqda”, — deyiladi metropoliten izohida.
Eslatib o‘tamiz, 5-fevral kuni “Xalqlar do‘stligi” va “Milliy bog‘” bekatlari oralig‘ida harakatlanib kelayotgan 4-sonli harakat tarkibida texnik nosozlik kuzatilgan va poyezd harakatdan to‘xtagan, 6-fevral kuni esa metro poyezdi “Mustaqillik maydoni” bekatida to‘xtab qolgan edi.
Izoh (0)