“Farg‘ona suv ta’minoti” mas’uliyati cheklangan jamiyati Rishton tuman bo‘limi va “Boyazitxon Fayz 2020” oilaviy korxonasining mansabdor shaxslari rasmiy hujjatlarni qalbakilashtirgan holda iste’molchilardan qabul qilingan juda ko‘p miqdordagi pul mablag‘larini o‘zlashtirgani aniqlandi, deb xabar beradi O‘zA.
Ma’lum qilinishicha, mazkur MCHJ aholidan ichimlik suv va oqova xizmati uchun 2020—2021-yillarda 1 ming 209 ta to‘lov pattalari orqali jami 117 million 724 ming so‘m naqd pullarni qabul qilib, ularni bo‘lim g‘aznasiga kirim qilmay, bankning hisob raqamiga topshirgan hamda iste’molchilarning Water Control billing bazasidagi shaxsiy varaqalariga kiritmasdan, shaxsiy ehtiyojlari uchun sarflab yuborgan.
Shuningdek, ushbu davrda 198 ta to‘lov pattalari orqali 33 million 45 ming so‘m pullarni qabul qilib, mazkur mablag‘lar iste’molchilarning shaxsiy varaqalariga kiritilgan bo‘lsa-da, to‘lov pattalarini qalbakilashtirib, go‘yoki 6 million 503 ming so‘m pullar qabul qilib olinganini ko‘rsatilgan. Qolgan pullarni esa o‘zlashtirib, talon-toroj qilingan. Bundan tashqari, aholidan 256 ta to‘lov pattalari orqali yig‘ilgan 13 million 828 ming so‘m naqd pullarni qabul qilib, aynan shu pattalarni boshqa iste’molchilarning nomidan takroran rasmiylashtirib, 19 million 751 ming so‘m pullarni bank hisob raqamiga topshirmasdan shaxsiy ehtiyojlari uchun sarflagani ma’lum bo‘lgan.
“Farg‘ona suv ta’minoti” mas’uliyati cheklangan jamiyati Rishton tumani bo‘limi mansabdor shaxslari tuman tadbirkorlikka ko‘maklashish markazi rahbari Sh.N. va boshqalar bilan til biriktirib, 120 nafar aholi iste’molchilarining suv hisoblagichlarini davlat qiyoslov ko‘rigidan o‘tkazish uchun 7 million 618 ming so‘m pullarni qabul qilib olib, hisoblagichlarni qiyoslovdan o‘tkazmay soxta sertifikatlar tayyorlab bergan hamda mablag‘lar talon-taroj qilingan.
Shuningdek, “Farg‘ona suv ta’minoti” mas’uliyati cheklangan jamiyati Rishton tumani bo‘limi rahbari J.S. bo‘lim ma’muriy binosida o‘zining ta’sischiligi va rahbarligida Paynet xizmatini ko‘rsatuvchi “Boyazitxon Fayz 2020” oilaviy korxonasini tashkil qilib, mazkur shoxobcha orqali 2021-yil 20-dekabrdan 2022-yil 21-fevralga qadar fuqarolardan ichimlik suv va oqova xizmati uchun 548 million 108,2 ming so‘m naqd pullarni qabul qilib olib, hisob raqamga o‘tkazmay juda ko‘p miqdordagi pul mablag‘larini firibgarlik yo‘li bilan qo‘lga kiritgan.
Holat yuzasidan “Farg‘ona suv ta’minoti” mas’uliyati cheklangan jamiyati Rishton tumani bo‘limi va “Boyazitxon Fayz 2020” oilaviy korxonasining mansabdor shaxslari hamda boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi, 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a,b” bandlari va 3-qismi bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq O‘zbekistonda 23 ta uy-joy mulkdorlari shirkati tomonidan 1,7 mlrd so‘m talon-toroj qilingani, Olmaliqda qariyb 220 mln so‘mlik nasos agregatorlarini o‘zlashtirgan korxona rahbari ushlangani, Surxondaryoda 220 ming dollarlik kredit mablag‘larini o‘zlashtirgan MCHJ rahbari aniqlangani to‘g‘risida xabar berilgandi.
Izoh (0)