O‘zbekistonda hokimlar mehnat migratsiyasidan qaytgan fuqarolarni qurilishga jalb qilish uchun subsidiya ajratiladi

Shavkat Mirziyoyev 31-mart kuni o‘tkazilgan videoselektor yig‘ilishida ish o‘rinlarini tashkil etish, bandlikni ta’minlash masalalariga alohida e’tibor qaratdi, deb xabar bermoqda Prezident matbuot kotibi.

“Bunga faqat iqtisodiy ko‘rsatkich sifatida emas, balki xalqimizning ijtimoiy himoya nuqtayi nazaridan qarash zarur va shart”, — degan prezident.

Qayd etilishicha, ayrim viloyat, tuman va shahar hokimlari tomonidan yangi ish o‘rinlarini yaratish va bandlikni ta’minlash bo‘yicha rejalar qoniqarsiz bajarilayotgani ko‘rsatib o‘tilgan. Andijon, Samarqand, Surxondaryo, Farg‘ona va Xorazmda yanvar—fevral oylaridagi bandlik dasturi ijrosi yillik rejaga nisbatan past. Tuman va shaharlar kesimida Samarqand, Termiz, Nurafshon, Zarafshon shaharlari, Amudaryo, Qorovulbozor, Denov, Qiziriq, Shovot tumanlarida 2 oylik ko‘rsatkichlar qolgan hududlardan ancha past. Xizmatlar va hunarmandchilikda bandlikni ta’minlashda ham ko‘plab tumanlarda ishlar qoniqarsiz.

Yarim yil yakuni bilan natija bo‘lmasa, ushbu shahar va tuman hokimlari va sektor rahbarlari lavozimidan ozod etilishi ta’kidlangan.

Shuningdek, bugungi kunda 67 ta faoliyat turi o‘zini o‘zi band qilish shakliga o‘tkazilgan. Prezident faoliyat turlarini yana 20 taga ko‘paytirish va bu orqali qo‘shimcha 150 ming aholi bandligi ta’minlash mumkinligini ko‘rsatib o‘tgan.

Viloyat hokimlari mehnat migratsiyasidan qaytgan fuqarolarni qurilishlarga jalb qilish, ularga zarur asbob-uskunalar olib berish uchun subsidiya ajratish hisobiga qo‘shimcha 100 ming aholining rasmiy bandligini ta’minlashi kerakligi ta’kidlangan. Bandlikni ta’minlash uchun yangi mexanizmlarni joriy etish bo‘yicha qaror loyihasini kiritish topshirilgan.

Dunyo bozorlaridagi holat, xomashyo, yoqilg‘i va oziq-ovqat mahsulotlari narxining o‘sib borishi, qo‘shni davlatlardan pul o‘tkazmalarining kamayishi aholi daromadlariga ko‘rsatishi mumkin bo‘lgan ta’sirni hisobga olib va inflyatsiya hisob-kitoblaridan kelib chiqib, ehtiyojmand aholini ijtimoiy qo‘llab-quvvatlash ko‘lamini yanada kengaytirish bo‘yicha takliflar kiritish vazifasi qo‘yildi.