O‘zbekistonda Ramazon oyi 2-apreldan boshlanadi. Bu haqda Musulmonlar idorasi xabar qildi.
Qayd etilishicha, prezident “Muborak Ramazon oyini munosib tarzda o‘tkazish to‘g‘risida”gi qarorini imzolagan. Unga ko‘ra, 2022-yilgi Ramazon oyining boshlanishi 2-aprel kuniga to‘g‘ri kelishi haqidagi O‘zbekiston musulmonlar idorasining axboroti ma’lumot uchun qabul qilingan.
O‘zbekiston musulmonlari idorasi Ulamolari kengashi tomonidan Islom dini manbalari va astronomik ma’lumotlarga tayangan holda 2022-yilda Ramazon oyining birinchi kuni shu yil 2-aprel, shanba kuniga to‘g‘ri kelishi haqida xulosa qilingan.
O‘zbekiston musulmonlari idorasining “Qur’on va tajvidni o‘rgatish” bo‘limi tomonidan 1443/2022-yil Ramazon oyida Toshkent shahri masjidlarida tarovih namozlarida o‘qiladigan xatmi Qur’onning kunlik taqsimoti belgilandi. Unga ko‘ra, xatmi Qur’on aprelning birinchi kunidan boshlab, 27 sana – Qadr kechasida yakunlanishi mo‘ljallanmoqda.
Avvalroq O‘zbekiston musulmonlari idorasida Ramazon oyini munosib kutib olish va islom dini tartib-qoidalari asosida oyni kuzatish bo‘yicha ishchi guruh tuzilgani, Qozog‘istonda 2022-yildagi Ramazon oyi 2-apreldan boshlanib, 2-mayga qadar davom etishi e’lon qilingani to‘g‘risida xabar berilgandi.
Eslatib o‘tamiz, Din ishlari bo‘yicha qo‘mita 2021-yilgi Ramazon oyida O‘zbekistonda tarovih namozlarida har kuni o‘rtacha 600 mingga yaqin namozxon qatnashganini ma’lum qilgan edi.
Mavzuga doir: “Ramazon oyida Umra narxi oshadi” — Musulmonlar idorasi
Izoh (0)