Ўзбекистонда Рамазон ойи 2 апрелдан бошланади. Бу ҳақда Мусулмонлар идораси хабар қилди.
Қайд этилишича, президент «Муборак Рамазон ойини муносиб тарзда ўтказиш тўғрисида»ги қарорини имзолаган. Унга кўра, 2022 йилги Рамазон ойининг бошланиши 2 апрель кунига тўғри келиши ҳақидаги Ўзбекистон мусулмонлар идорасининг ахбороти маълумот учун қабул қилинган.
Ўзбекистон мусулмонлари идораси Уламолари кенгаши томонидан Ислом дини манбалари ва астрономик маълумотларга таянган ҳолда 2022 йилда Рамазон ойининг биринчи куни шу йил 2 апрель, шанба кунига тўғри келиши ҳақида хулоса қилинган.
Ўзбекистон мусулмонлари идорасининг «Қуръон ва тажвидни ўргатиш» бўлими томонидан 1443/2022 йил Рамазон ойида Тошкент шаҳри масжидларида таровиҳ намозларида ўқиладиган хатми Қуръоннинг кунлик тақсимоти белгиланди. Унга кўра, хатми Қуръон апрелнинг биринчи кунидан бошлаб, 27 сана – Қадр кечасида якунланиши мўлжалланмоқда.
Аввалроқ Ўзбекистон мусулмонлари идорасида Рамазон ойини муносиб кутиб олиш ва ислом дини тартиб-қоидалари асосида ойни кузатиш бўйича ишчи гуруҳ тузилгани, Қозоғистонда 2022 йилдаги Рамазон ойи 2 апрелдан бошланиб, 2 майга қадар давом этиши эълон қилингани тўғрисида хабар берилганди.
Эслатиб ўтамиз, Дин ишлари бўйича қўмита 2021 йилги Рамазон ойида Ўзбекистонда таровиҳ намозларида ҳар куни ўртача 600 мингга яқин намозхон қатнашганини маълум қилган эди.
Мавзуга доир: «Рамазон ойида Умра нархи ошади» — Мусулмонлар идораси
Изоҳ (0)