Jinoyat ishlari bo‘yicha Marhamat tuman sudi tomonidan tumandagi 72-ixtisoslashtirilgan davlat umumta’lim maktabi o‘qituvchilarini ota-onalardan uzr so‘rashga majbur qilgan hokim o‘rinbosari Muxtorjon Qurbonovga nisbatan 2 million 700 ming so‘m jarima jazosi tayinlandi. Bu haqda “Daryo”ga Andijon viloyat sudi axborot xizmati xabar bermoqda.
Muxtorjon Qurbonov 2022-yilning 4-fevral kuni tumandagi 72-ixtisoslashtirilgan davlat umumta’lim maktabida o‘qituvchilariga ta’lim sifati, o‘quvchilarning oliygohga kirish ko‘rsatkichi pastligini vaj qilib, buning uchun ota-onalardan uzr so‘rashlari to‘g‘risida topshiriq bergan. Hamda buni amalga oshirtirib, ta’lim muassasasi pedagog xodimlarining kasbiy faoliyatiga qonunga xilof ravishda aralashgan.
Huquqbuzar sudda aybiga iqror bo‘lib, pushaymonligini bildirgan.
Mazkur ishni ko‘rib chiqqan sudya Zarifjon Rahimov unga nisbatan jazo tayinlashda ishdagi og‘irlashtiruvchi va yengillashtiruvchi holatlarni, yengillashtiruvchi holatlar tariqasida qilmishidan chin ko‘ngildan pushaymonligini, muqaddam ma’muriy javobgarlikka tortilmaganligini va boshqa holatlarni inobatga olib, unga nisbatan qonun sanksiyasida ko‘rsatilgan jarima jazosini tayinlashni lozim topgan.
Sud qarori bilan Muxtorjon Qurbonov Ma’muriy javobgarlik to‘g‘risidagi kodeksning 197-5-moddasi 1-qismida (ta’lim muassasasi pedagog xodimining kasbiy faoliyatiga qonunga xilof ravishda aralashish yoki o‘z xizmat vazifalarini bajarishiga to‘sqinlik qilish) nazarda tutilgan huquqbuzarlikni sodir etganlikda aybli deb topilgan. Unga nisbatan bazaviy hisoblash miqdorining o‘n baravari, ya’ni 2 million 700 ming so‘m jarima jazosi tayinlangan.
2022-yilning 8-fevral kuni Andijon viloyatining Marhamat tumanidagi maktabda o‘qituvchilar o‘quvchilarning o‘zlashtirishi qoniqarsizligi sabab ota-onalardan uzr so‘ragani aytilgan xabar e’lon qilindi. Holat keng jamoatchilik muhokamasiga sabab bo‘ldi. Xususan, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov “Shuhrat Abdurahmonovning shaxsan o‘zi barcha ustozlardan uzr so‘rashi kerak”ligini yozdi. Xalq ta’limi vaziri ham holatga munosabat bildirib, o‘qituvchilarning sha’nini yerga urishni davlat siyosatiga qarshi harakat deb baholashini bildirdi. Holatni izohlagan tuman hokimligi o‘tkazilgan tadbir ijtimoiy tarmoqlarda boshqacha talqin qilinganini yozdi. Andijon viloyati hokimi Shuhrat Abdurahmonov ham ushbu holatga munosabat bildirib, “xatoga yo‘l qo‘ygan har qanday rahbarga qonunda belgilangan jazo choralarini ko‘rilishini ta’minlanishini” ta’kidladi. So‘ngra viloyat xalq ta’limi boshqarmasi boshlig‘i va Marhamat tumani hokimi o‘qituvchilardan uzr so‘radi. XTVning ma’lum qilishicha, holat yuzasidan o‘rganish natijalariga qonuniy baho berish uchun hujjatlar Bosh prokuraturaga yuborilgan.
12 fevral kuni xalq ta’limi vaziri Baxtiyor Saidov tumandagi uzr so‘rashga majburlangan o‘qituvchilar bilan uchrashdi.
Izoh (0)