Qonun loyihasi O‘zbekiston Respublikasi Prezidenti Administratsiyasining 2019-yil 30-maydagi topshirig‘iga asosan, O‘zbekiston Respublikasi Prezidentining 2019-yil 11-sentabrdagi “Iste’molchilar huquqlarini himoya qilishning huquqiy va institutsional tizimini tubdan takomillashtirish chora-tadbirlari to‘g‘risida”gi PF 5817-son farmoni va 2020-yil 10-noyabrdagi “Aholining sog‘lom ovqatlanishini ta’minlash bo‘yicha qo‘shimcha chora-tadbirlar to‘g‘risida” PQ 4887-son qarori va boshqa hujjatlar ijrosini ta’minlash yuzasidan ishlab chiqilgan.
Qonun loyihasi 7 ta bob va 53 ta moddadan iborat.
Qonun loyihasi 11 ta vazirlik va idoralar bilan kelishilgan, jamoatchilik muhokamasidan o‘tkazilgan. Qonun loyihasini ishlab chiqishda 30 ga yaqin xorijiy davlat qonunlari, xalqaro hujjatlar va boshqa ilmiy nashrlar tahlil qilindi (amaldagi “Reklama to‘g‘risida”gi qonun 1998-yil 25-dekabrda qabul qilingan bo‘lib, 30 ta moddadan iborat. Bugungi kunga qadar unga 15 marotaba o‘zgartirish va qo‘shimchalar kiritilgan).
Yangi qonun loyihasida quyidagilar belgilanmoqda:
1. qonun normalarini qo‘llashda noaniqliklarga olib kelgan ayrim tushunchalarga aniqlik kiritilmoqda va yangi tushunchalar kiritilmoqda (qonun loyihasi “reklama obyekti”, “integratsiyalashtirilgan reklama”, “ichki reklama”, “nomuvofiq reklama”, “axloqsiz reklama”, “yashirin reklama”, “homiylik” kabi yangi tushunchalar bilan to‘ldirilmoqda);
2. reklama sohasini tartibga solish bo‘yicha Vazirlar Mahkamasi va vakolatli organning hamda nodavlat tashkilotlarning vakolatlari, shuningdek, reklama to‘g‘risidagi qonun hujjatlari talablariga rioya etilishini tahlil qilish asoslari va tartibi o‘rnatilmoqda;
3. O‘zbekiston Respublikasi hududida reklama davlat tilida tarqatilishi va reklama mazmunining tarjimasi qo‘shimcha ravishda boshqa tillarda takrorlanishi mumkinligi belgilanmoqda (amalda O‘zbekiston Respublikasi hududida reklama davlat tilida yoki reklama beruvchining xohishiga ko‘ra boshqa tillarda tarqatiladi);
4. televideniye, radio, bosma ommaviy axborot vositalari va telekommunikatsiya, jumladan, mobil aloqa tarmoqlarida reklama joylashtirish tartibi takomillashtirilmoqda;
5. mobil aloqa tarmog‘i orqali reklama tarqatilishiga faqat iste’molchining roziligi bilan yo‘l qo‘yilishi o‘rnatilmoqda;
6. elektron tijoratda mahsulot reklamasi, tashqi reklama obyektlarini o‘rnatish (tashqi reklama binolarning me’moriy qiyofasi, shaharsozlik normalari va qoidalariga muvofiq bo‘lishi kerak. Tashqi reklama va axborot obyektlarini o‘rnatish chizmasi hokimliklarning rasmiy saytlarida e’lon qilinishi lozim. Darsliklar va daftarlarda reklama joylashtirish: reklama narxlarini xorijiy valyutada ko‘rsatish,axloq va ma’naviyatning umum qabul qilingan normalariga zid keluvchi shakl, ibora, va obrazlardan foydalanish,tovarning asosiy xususiyatlari to‘g‘risidagi ma’lumotlarni iste’molchidan yashirish taqiqlanmoqda) tartibga solinmoqda;
7. ichki reklama hamda reklamada ogohlantirish va qo‘shimcha axborotlarni berish tartibga solinmoqda. Xususan, iste’molchilar hayoti, sog‘lig‘i va xavfsizligi bilan bog‘liq mahsulotlar (dori, biologik faol ozuqaviy qo‘shimchalar, energetik ichimliklar, xalq tabobati mahsulotlari, tamaki, chilim, alkogol mahsulotlari, pirotexnika vositalari, qurol-yarog‘) reklamasiga qo‘yiladigan talablar takomillashtirilmoqda (taniqli shaxslarning, tibbiyot xodimlarining yoki tashqi ko‘rinishi shifokorlarning tashqi ko‘rinishiga o‘xshash shaxslarning ishtirokidan foydalanish taqiqlanadi);
8. qimmatli qog‘ozlar, moliyaviy va aholining pul mablag‘larini jalb qilish bilan bog‘liq xizmatlarni reklama qilish, rag‘batlantiruvchi reklama aksiyalarini tashkil etish va o‘tkazish tartibga solinmoqda. Bunday oziq-ovqat mahsulotlari zararsiz va inson salomatligi uchun foydali ekanligi to‘g‘risida ta’kidlash, reklamada voyaga yetmaganlarga murojaat qilish, shuningdek bolalar, animatsion personajlar va bolalar ko‘rsatuvlari qahramonlaridan foydalanish taqiqlanmoqda.
O‘zbekiston Respublikasi Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi
Izoh (0)