BMT Inson huquqlari bo‘yicha kengashining 49-sessiyasida O‘zbekiston delegatsiyasi rahbari Akmal Saidov ma’ruza qildi, deb xabar beradi “Dunyo” agentligi.
Inson huquqlari bo‘yicha Milliy markazdan olingan ma’lumotga ko‘ra, Jeneva shahrida 2022-yil 28-fevral kuni boshlangan BMT Inson huquqlari bo‘yicha kengashining 49-sessiyasi o‘z ishini davom ettirmoqda. Sessiyaning Oliy darajadagi segmenti majlisida 2-mart kuni Oliy Majlis Qonunchilik palatasi spikerining birinchi o‘rinbosari, Inson huquqlari bo‘yicha Milliy markaz direktori Akmal Saidov so‘zga chiqqan.
“Xuddi shu sanada O‘zbekiston jahondagi eng nufuzli xalqaro tashkilot – BMTga a’zo bo‘lganiga roppa-rosa 30 yil to‘ldi. O‘zbekiston BMTning inson manfaatlari yo‘lida sa’y-harakatga da’vatini qo‘llab-quvvatlaydi”, — deydi u.
Akmal Saidov BMT Bosh Assambleyasi sessiyasida 2020-yil 13-oktabr kuni bo‘lib o‘tgan saylovda O‘zbekiston milliy davlatchiligining tarixida ilk bor BMTning Inson huquqlari bo‘yicha kengashi a’zoligiga uch yil muddatga — 2021–2023-yillarga saylanganini qayd etgan. O‘zbekiston 2021-yil 1-yanvardan boshlab bu boradagi vazifasini bajarib kelmoqda.
Ma’ruzada O‘zbekistonning BMT Inson huquqlari bo‘yicha kengashi a’zosi sifatida zimmasiga olgan majburiyatlari doirasidagi faoliyati haqida ham so‘z yuritilgan. Xususan, O‘zbekiston 021-yilda BMT Nogironlar huquqlari to‘g‘risidagi konvensiyasini ratifikatsiya qilgan. 2021-yil dekabrida esa “Markaziy Osiyo mamlakatlari yetakchi ayollarining muloqoti” shafeligida, fuqarolik jamiyatining xotin-qizlar tashkilotlari va “BMT-ayollar” tuzilmasi ishtirokida mintaqaviy forum o‘tkazilgan.
O‘zbekiston tashabbusi bilan BMT Inson huquqlari bo‘yicha kengashining Pandemiya sharoitida yoshlar huquqlarini himoya qilish to‘g‘risidagi rezolyutsiyasi qabul qilingan. 2021-yil avgustida Toshkentda “Global harakatlarga yoshlarni jalb qilish” mavzusida Yoshlar huquqlari bo‘yicha butunjahon konferensiyasi bo‘lib o‘tgan. Akmal Saidov ushbu forumni o‘tkazishda ko‘rsatgan yordami uchun Oliy komissarga minnatdorchilik izhor etdi.
“Inson huquqlari bo‘yicha kengashning Yoshlar huquqlari masalalari bo‘yicha maxsus ma’ruzachisi lavozimini joriy etish borasidagi O‘zbekiston tashabbusi qo‘llab-quvvatlangani uchun ham tashakkur bildiramiz”, — deydi O‘zbekiston delegatsiyasi rahbari.
BMTning fuqaroligi yo‘q shaxslar sonini kamaytirishga oid chaqirig‘iga javoban, 2020-yilda mamlakatda “O‘zbekiston fuqaroligi to‘g‘risida”gi qonun qabul qilingan va shu asosda qisqa davrda 70 ming nafardan ziyod fuqaroligi yo‘q shaxs O‘zbekiston fuqarolari sifatida e’tirof etilgan.
Ma’ruzada, shuningdek, Inson huquqlari bo‘yicha O‘zbekiston Milliy strategiyasi doirasida amalga oshirilayotgan sa’y-harakatlar yoritib berilgan. Jumladan, 2021-2025-yillarda fuqarolik jamiyatini rivojlantirish konsepsiyasi tasdiqlangani, “Vijdon erkinligi va diniy tashkilotlar to‘g‘risida”gi yangi qonun qabul qilingani, O‘zbekistonda 2030-yilgacha gender tenglikka erishish strategiyasi tasdiqlangani, BMTning Inson huquqlari ta’limi butunjahon dasturining to‘rtinchi bosqichi doirasida Inson huquqlari bo‘yicha ta’lim sohasida Milliy dastur loyihasi ishlab chiqilgani kabi amaliy natijalarga e’tibor qaratilgan.
Inson huquqlari bo‘yicha oliy komissar Boshqarmasi bilan birgalikda bu yil “Inson huquqlari sohasida ta’lim” Global forumini o‘tkazish rejalashtirilmoqda. Shu munosabat bilan Akmal Saidov xalqaro jamoatchilik vakillarini ushbu tadbirlarda faol ishtirok etishga taklif qilgan.
Bundan tashqari, ma’ruzada so‘nggi yillarda O‘zbekiston BMTning maxsus protseduralari bilan o‘zaro hamkorlikda sezilarli ilgari siljishlarga erishgani ta’kidlangan. Xususan, barcha mandat egalariga O‘zbekistonga tashrif buyurish uchun doimiy taklifnoma yo‘llangan.
“O‘zbekiston dunyoning barcha mamlakatlari bilan manfaatli hamkorlik qilishga va BMT hamda uning institutlari bilan amaliy muloqotga hamisha tayyor. Binobarin, O‘zbekiston BMTning Inson huquqlari bo‘yicha kengashiga a’zoligi davrida inson huquqlari sohasida eng yuksak standartlarga sodiqligini namoyon qilishga astoydil intilmoqda”, — deya ta’kidlagan Akmal Saidov.