Shavkat Mirziyoyev 1-mart kuni o‘tkazilgan videoselektor yig‘ilishida Ta’lim tizimida xotin-qizlar uchun yana bir qator keng imkoniyatlar yaratilayotgani haqida gapirgani to‘g‘risida xabar berilgandi. Prezident matbuot kotibining yozishicha, 2022—2026-yillarga mo‘ljallangan Xotin-qizlar ta’limini qo‘llab-quvvatlash dasturi qabul qilinadi.
Dastur doirasida ayni paytda ayollar ulushi past bo‘lgan aniq fanlar, texnika va huquqshunoslik yo‘nalishidagi OTMlarda xotin-qiz talabalar ulushi hozirgi 24 foizdan 40 foizgacha yetkaziladi. Buning uchun har yili xotin-qizlarning talaba bo‘lishiga kvotaning kamida 50 foizi aniq fanlar, texnika va huquqshunoslik yo‘nalishlari uchun maqsadli ajratiladi.
Yangi o‘quv yilidan boshlab oliygoh, texnikum va kollejlarda o‘qiyotgan qizlarga ta’lim kontraktlarini to‘lash uchun ilk marotaba, 7 yil muddatga foizsiz kredit berish joriy qilinadi.
“Bu imkoniyat hali bizning tariximizda, umuman bo‘lmagan”, — deydi Shavkat Mirziyoyev.
Avvalroq O‘zbekistonda “ayollar daftari”ga kiritilgan yolg‘iz ayollarning farzandlari ham bog‘chaga imtiyozli ro‘yxat asosida qabul qilinishi, viloyat hokimlari mahalliy budjet hisobidan 100 nafardan xotin-qizlarning kontrakt pulini to‘lab berishi, Namanganda boquvchisini yo‘qotgan xotin-qizlarning 100 nafariga bir yillik kontrakt-to‘lov pullari to‘lab berilgani to‘g‘risida xabar berilgandi.
Izoh (0)