Markaziy Osiyo davlatlari va Amerika Qo‘shma Shtatlarining C5+1 shaklidagi navbatdagi vazirlar uchrashuvi 28-fevral kuni bo‘lib o‘tdi. Bu haqda “Daryo” muxbiri xabar qildi.
Qayd etilishicha, videokonferensaloqa shaklida o‘tkazilgan tadbirda O‘zbekiston tashqi ishlar vaziri Abdulaziz Komilov, Qirg‘iziston tashqi ishlar vaziri Ruslan Kazakbayev, Qozog‘iston tashqi ishlar vaziri Muxtor Tleuberdi, Tojikiston tashqi ishlar vaziri Sirojiddin Muhriddin va AQSh davlat kotibi Entoni Blinken ishtirok etgan. Tashqi siyosiy idoralar rahbarlari C5+1 doirasidagi hamkorlikning dolzarb masalalarini muhokama qilgan. Mintaqaviy kun tartibi yuzasidan fikr almashgan.
Muloqotda iqtisodiyot, xavfsizlik, iqlim o‘zgarishiga qarshi kurashish, shuningdek, Afg‘onistondagi vaziyat yuzasidan amaliy hamkorlikni mustahkamlash bo‘yicha takliflar ko‘rib chiqilgan.
O‘zbekiston tashqi ishlar vaziri Abdulaziz Komilov o‘z nutqida iqlim va ekologik o‘zgarishlarning oqibatlarini yumshatish, mintaqada “yashil iqtisodiy o‘sish”ni ta’minlash, pandemiyaga qarshi kurashish borasidagi sa’y-harakatlarni muvofiqlashtirish, o‘zaro savdo, investitsiya va transport aloqalarini rivojlantirish dasturlarini amalga oshirish orqali C5+1 yo‘nalishi bo‘yicha hamkorlikni faollashtirish uchun imkoniyatlar mavjudligini ta’kidlagan.
Izoh (0)