Марказий Осиё давлатлари ва Америка Қўшма Штатларининг C5+1 шаклидаги навбатдаги вазирлар учрашуви 28 февраль куни бўлиб ўтди. Бу ҳақда «Дарё» мухбири хабар қилди.
Қайд этилишича, видеоконференцалоқа шаклида ўтказилган тадбирда Ўзбекистон ташқи ишлар вазири Абдулазиз Комилов, Қирғизистон ташқи ишлар вазири Руслан Казакбаев, Қозоғистон ташқи ишлар вазири Мухтор Тлеуберди, Тожикистон ташқи ишлар вазири Сирожиддин Муҳриддин ва АҚШ давлат котиби Энтони Блинкен иштирок этган. Ташқи сиёсий идоралар раҳбарлари C5+1 доирасидаги ҳамкорликнинг долзарб масалаларини муҳокама қилган. Минтақавий кун тартиби юзасидан фикр алмашган.
Мулоқотда иқтисодиёт, хавфсизлик, иқлим ўзгаришига қарши курашиш, шунингдек, Афғонистондаги вазият юзасидан амалий ҳамкорликни мустаҳкамлаш бўйича таклифлар кўриб чиқилган.
Ўзбекистон ташқи ишлар вазири Абдулазиз Комилов ўз нутқида иқлим ва экологик ўзгаришларнинг оқибатларини юмшатиш, минтақада «яшил иқтисодий ўсиш»ни таъминлаш, пандемияга қарши курашиш борасидаги саъй-ҳаракатларни мувофиқлаштириш, ўзаро савдо, инвестиция ва транспорт алоқаларини ривожлантириш дастурларини амалга ошириш орқали C5+1 йўналиши бўйича ҳамкорликни фаоллаштириш учун имкониятлар мавжудлигини таъкидлаган.
Изоҳ (0)