25-fevral kuni ertalab Ukraina prezidenti Vladimir Zelenskiy mamlakat fuqarolariga yangi murojaat bilan chiqdi. U ukrainaliklarni Rossiya agressiyasidan himoyalanishda davom etishga chaqirdi.
“Faqat ukrainaliklarning birdamligi va qat’iyati bizning erkinligimizni saqlab qolish va davlatni himoya qilishga qodir. Armiya, chegara qo‘shinlari, Milliy gvardiya, politsiya, razvedka, hududiy mudofaa kuchlari o‘z vazifalarini maksimal darajada bajarmoqda”, — dedi u.
Prezidentning so‘zlariga ko‘ra, Ukraina yakkalanib qolgan, Rossiyani yangi sanksiyalar qo‘rqita olmadi, dunyo esa bo‘layotgan voqealarni uzoqdan kuzatib turibdi.
Biroq, Zelenskiyning fikricha, ertami-kechmi Rossiya Ukraina bilan muloqotga kirishishi kerak. “Urushni qanday tugatish va bu bosqinni to‘xtatish haqida gaplashamiz. Bu suhbat qanchalik tez boshlansa, Rossiyaning o‘zidan ham shunchalik kam yo‘qotish bo‘ladi”, — dedi u.
Nutqi oxirida Zelenskiy rus tilida Rossiya fuqarolariga murojaat qildi.
Hurmatli Rossiya Federatsiyasi fuqarolari! Bugun tunda qahramon-shahar Kiyevning turar joylarini bombardimon qila boshlashdi. Bularning barchasi menga 1941-yilni eslatyapti. Norozilik bildirish uchun chiqqan Rossiya Federatsiyasining barcha fuqarolariga aytmoqchiman: biz sizni ko‘ryapmiz. Bu siz bizni eshitganingizni anglatadi, demak bizga ishonishni boshladingiz. Biz uchun jang qiling, urushga qarshi kurashing.
Rossiya—Ukraina urushiga oid tezkor, ishonchli yangiliklar va ma’lumotlarni Daryo’ning live sahifasi orqali kuzatib boring → @Daryo_Live
Izoh (0)