25 февраль куни эрталаб Украина президенти Владимир Зеленский мамлакат фуқароларига янги мурожаат билан чиқди. У украиналикларни Россия агрессиясидан ҳимояланишда давом этишга чақирди.
«Фақат украиналикларнинг бирдамлиги ва қатъияти бизнинг эркинлигимизни сақлаб қолиш ва давлатни ҳимоя қилишга қодир. Армия, чегара қўшинлари, Миллий гвардия, полиция, разведка, ҳудудий мудофаа кучлари ўз вазифаларини максимал даражада бажармоқда», — деди у.
Президентнинг сўзларига кўра, Украина яккаланиб қолган, Россияни янги санкциялар қўрқита олмади, дунё эса бўлаётган воқеаларни узоқдан кузатиб турибди.
Бироқ, Зеленскийнинг фикрича, эртами-кечми Россия Украина билан мулоқотга киришиши керак. «Урушни қандай тугатиш ва бу босқинни тўхтатиш ҳақида гаплашамиз. Бу суҳбат қанчалик тез бошланса, Россиянинг ўзидан ҳам шунчалик кам йўқотиш бўлади», — деди у.
Нутқи охирида Зеленский рус тилида Россия фуқароларига мурожаат қилди.
Ҳурматли Россия Федерацияси фуқаролари! Бугун тунда қаҳрамон-шаҳар Киевнинг турар жойларини бомбардимон қила бошлашди. Буларнинг барчаси менга 1941 йилни эслатяпти. Норозилик билдириш учун чиққан Россия Федерациясининг барча фуқароларига айтмоқчиман: биз сизни кўряпмиз. Бу сиз бизни эшитганингизни англатади, демак бизга ишонишни бошладингиз. Биз учун жанг қилинг, урушга қарши курашинг.
Россия—Украина урушига оид тезкор, ишончли янгиликлар ва маълумотларни Дарйўнинг ливе саҳифаси орқали кузатиб боринг → @Daryo_Live
Изоҳ (0)