Toshkent viloyati hokimi Zoir Mirzayev viloyatning chekka qishloqlaridan biri Pskom qishlog‘iga borib, tunab qolishini bildirgan. Bu haqda viloyat hokimligi axborot xizmati xabar berdi.
Zoir Mirzayev chekka qishloqda uni qarshilagan aholi vakillari bilan suhbatlashar ekan, viloyatning barcha rahbarlarini shu qishloqqa olib kelganini, aholi muammosini o‘rganishni maqsad qilganini bildirgan.
“Bugun shu qishloqda qolaylik va aholi bilan suhbatlashaylik, dedik. Barcha muammolarni birgalikda o‘rganamiz. Viloyatning barcha rahbarlarini olib keldim. Bilasiz, ko‘pchilik rahbarlar shaharda yashaydi. Ular ham qishloq hayotini ko‘rsa, pechka, o‘tin va ko‘mir degan narsalarni bilsa, yoniga murojaat qilib borgan aholiga boshqacha munosabatda bo‘ladi”, — deydi aholi vakillari bilan suhbatlashgan Zoir Mirzayev.
Zoir Mirzayevning OAV vakillari bilan suhbatidan anglashilicha, so‘nggi 20-22 yil davomida Toshkent viloyatida rahbarlik qilgan hokimlar orasida Zoir Mirzayev Pskom qishlog‘iga borishga qaror qilgan.
“Biz bu qishloq muammosini eshitib, bilib, shu yerga kelyapmiz. Bizga dastlab yo‘l masalasini aytishdi. Yo‘l bo‘yicha hisob-kitobimiz bor. Shuningdek, shu qishloqda yashovchi ayollar pishiriq pishirish bilan shug‘ullanar ekan. Ammo ularda joy muammosi bor ekan. Balki, shu yerda turgan bo‘sh binoni shu ayollarga moslashtirib berarmiz deb rejalashtiryapmiz. Qolaversa, qo‘shni qishloqda tibbiyot maskani yo‘q deyishdi. O‘rganib chiqsak, tibbiyot muassasasi emas, tibbiyot xodimi yetishmas ekan. Xullas, bugun aynan shu qishloq muammolarini hal etishni maqsad qilganmiz”, — deydi jurnalistlar savoliga javob bergan Zoir Mirzayev.Zoir Mirzayev chekka qishloqlarda tunab qolib, aholi muammosini o‘rganishni Qashqadaryo viloyatida rahbarlik qilayotgan paytidan odat qilgan bo‘lib, u 2020-yil Qashqadaryo viloyatining eng chekka qishlog‘i — Sarchashma qishlog‘ida bo‘lib, aholi to‘yida mehmon bo‘lgandi.
Izoh (0)