“Tilimni yutvorib, gapirolmay qolganman”. Zarina Nizomiddinova Islom Karimov bilan uchrashgani haqida (video)

Aktrisa Zarina Nizomiddinova O‘zbekistonning birinchi prezidenti Islom Karimov bilan uchrashganida qanday hislarni boshdan kechirgani haqida so‘zlab berdi.

“Ular bilan tushgan suratim yo‘q, lekin o‘zimni judayam baxtli inson deb hisoblayman. 2006-yilda Navro‘z bayramida chiqish qilganmiz. O‘shanda xoreografiya bilim yurtida tahsil olardim. Har bayramning oxirida, finalda prezidentimiz chiqib xonandalar bilan ko‘rishardilar. O‘sha payt biz hammamiz chekkaga o‘tdik, chapak chalib turibmiz. Shu narsalarni bir oy repetitsiya qilganmiz. Rahmatli Islom bobo hamma bilan ko‘rishib bo‘lgach, kutilmaganda biz turgan joyga qarab kelyaptilar. Qarasam, bizning qatorimizdagi hamma raqqosalardan hol-ahvol so‘rab kelyaptilar. Keyin mening oldimga kelib, ‘Charchamadingizmi?’ deb so‘radilar, qo‘llarini cho‘zib, so‘rashdilar. Shunaqa darajada salobatli odam ekanliklaridan tilimni yutvorib, gapirolmay qolganman. Faqat qarab turaverdim. Keyin esa ‘Mehnatlaringga rozi bo‘linglar’, deb ketdilar. Men yugurib borib, kiyim almashtiradigan xonada kiyimlarimni almashtirib, taksiga o‘tirganman. Taksida ham haydovchiga bo‘lgan voqeani hayajon bilan gapirib berganman. Uyga borib, hamma qarindoshlarga qo‘ng‘iroq qilib, prezident bilan uchrashganimni so‘zlab berganman”, — deydi aktrisa.