Kinematografiya agentligi bosh direktori Firdavs Abduxoliqovga nisbatan qo‘zg‘atilgan ma’muriy ish bo‘yicha 4-fevralda o‘tkazilishi kerak bo‘lgan sud majlisi qoldirildi.
UzReport’ning ma’lum qilishicha, uning advokati Abduxoliqovning sog‘lig‘i yomonlashgani sababli ishni ko‘rib chiqishni boshqa kunga qoldirishni so‘radi. Sud uning talabini qanoatlantirgan.
Eslatib o‘tamiz, Korrupsiyaga qarshi kurashish agentligi Kinematografiya agentligi rahbari Firdavs Abduxoliqov atrofidagi manfaatlar to‘qnashuvi yuzasidan o‘rganish olib borib, “Sevimli” telekanali bilan manfaatlar to‘qnashuvi borligi tasdiqlangandi.
25-yanvar kuni unga nisbatan Ma’muriy javobgarlik to‘g‘risidagi kodeksning 175-8-moddasi (davlat xaridlari to‘g‘risidagi qonunchilikni buzish) 4-qismi bilan ma’muriy huquqbuzarlik to‘g‘risidagi ish qo‘zg‘atilib, mazmunan ko‘rib chiqishlik uchun sudga yuborilgandi.
Ushbu ish mazmunan ko‘rib chiqish uchun jinoyat ishlari bo‘yicha Chilonzor tuman sudining ish yurituviga 26-yanvar kuni kelib tushgan va ishni sud majlisida ko‘rish uchun 27-yanvarga tayinlangan. 27-yanvarda bo‘lib o‘tgan sud majlisida Firdavs Abduxoliqov ishtirok etib, ko‘rsatma berdi.
Sud ishni ko‘rish bo‘yicha 31-yanvarga qadar tanaffus e’lon qildi. Shu kuni Firdavs Abduxoliqov sudga ariza bilan murojaat qilib, ishni ko‘rishni boshqa kunga qoldirishni so‘radi. Shundan so‘ng sudning keyingi ochiq majlisi 4-fevral kuni soat 10:00 da o‘tkazilishi belgilandi.
Ma’lumot uchun, yuqoridagi modda bilan aybdor deb topilgan mansabdor shaxs bazaviy hisoblash miqdorining 20 baravaridan 30 baravarigacha (2022-yil 4-fevral holatiga ko‘ra: 5,4 million so‘mdan 8,1 million so‘mgacha) miqdorda jarima solishga sabab bo‘ladi.
Izoh (0)