Qashqadaryo viloyati hokimi Murodjon Azimovning og‘zaki topshirig‘iga binoan viloyat chegaralaridagi yo‘l-patrul xizmati postlaridan chigitni Samarqand viloyatiga olib o‘tish taqiqlangani to‘g‘risida xabar berilgandi. Monopoliyaga qarshi kurashish qo‘mitasining aralashuvi va ko‘rsatmasiga binoan viloyatdan chigit olib chiqib ketilgan. Bu haqda qo‘mita matbuot xizmati xabar berdi.
2-yanvar kuni Samarqand viloyati Kattaqo‘rg‘on shahri hokimi, senator Gavhar Alimova shaharda qariyb 100 ta ish o‘rni yaratgan Marokand gold oil extraksiya korxonasi muammoga duch kelganini yozgandi. 28-dekabr kuni kompaniya rahbari Saydin Ro‘ziyev shahar hokimiyatiga kelib, tovar va xomashyo birjasidan ochiq savdolar asosida sotib olingan 100 tonna chigit mahsulotini Qashqadaryodan Samarqandga olib kela olmayotganini ma’lum qilgan. Qashqadaryo viloyati hokimligiga ko‘ra, chigit ortilgan yuk mashinalari “QR-kodli hisobvaraq-fakturasi bo‘lmagani” sababli to‘xtatib qo‘yilgan.
Keyinroq “Oqsaroy klaster” MChJ Samarqandga yuborilgan va yo‘lda ushlab qolingan chigit urug‘lik chigit bo‘lib, shu sababdan viloyatdan olib chiqilishiga yo‘l qo‘yilmaganini ma’lum qilgandi. Klaster zaxira urug‘lik chigitini qaytarib olib, Samarqanddagi Marokand gold oil extraksiya MChJ yog‘ korxonasiga 10 kun muddatda birja savdolari orqali yutib olingan texnik chigitni yetkazib berilishini bildirgandi. Shuningdek, yuzaga kelgan barcha xarajatlarni o‘z hisobidan qoplashi aytilgandi.
Monopoliyaga qarshi kurashish qo‘mitasi tomonidan ushbu holat nazoratga olinib, masalaga oydinlik kiritish maqsadida Qashqadaryo viloyati hokimiyati va Qashqadaryo viloyati IIBga so‘rovnoma yuborilgan. Viloyat mas’ullari va Qo‘mita xodimlari tomonidan bir necha marotaba onlayn uchrashuvlar o‘tkazilib, surishtiruv ishlari olib borilgan.
Qo‘mitaning ko‘rsatma qaroriga binoan hozirgi kunda Qashqadaryo viloyatining tegishli korxonalari tomonidan birja savdolariga qo‘yilgan chigit mahsulotlari tadbirkorlar tomonidan viloyatdan olib chiqib ketilgan.
Eslatib o‘tamiz, 2020-yilning noyabrida Qashqadaryo, Surxondaryo va Xorazm viloyatlari hokimlarining og‘zaki ko‘rsatmasiga binoan postlardagi yo‘l patrul xizmati tomonidan paxta chigitini bir viloyatdan boshqa viloyatga olib o‘tish taqiqlangandi. Monopoliyaga qarshi kurashish qo‘mitasining aralashuvidan so‘ng, taqiqlar olib tashlangan edi.
Izoh (0)