O‘zbekiston milliy terma jamoasining BAA klubiga qarshi nazorat o‘yinida ishtirok etishi rasman tasdiqlandi.

Foto: O‘FA

O‘zbekiston terma jamoasi 23-yanvar, yakshanba kuni Dubayda BAAning “Al-Vahda” klubiga qarshi o‘rtoqlik o‘yinini o‘tkazishi haqida xabar berilgandi. O‘FAning ma’lum qilishicha, nazorat o‘yini ikkala murabbiyning talabi bilan yopiq tarzda o‘tadi.

Mazkur yig‘in doirasida Yaponiyaga qarshi o‘rtoqlik o‘yini o‘tkazilishi kerak edi, biroq koronavirus bilan bog‘liq tang vaziyat tufayli Yaponiya so‘roviga ko‘ra 21-yanvar kuniga belgilangan uchrashuv bekor qilindi. Shuningdek, yig‘in doirasida 1-fevral kuni Yangi Zelandiyaga qarshi o‘rtoqlik o‘yini o‘tkaziladi.

Terma jamoa bosh murabbiyi Srechko Katanes (shu sababli u Sloveniyadan Dubayga kela olmagan) va Hojimat Erkinovda koronavirus aniqlangani haqida xabar berilgandi. Keyinroq Erkinovning sog‘ayib safga qaytgani va darvozabon Umidjon Ergashevda koronavirus infeksiyasi aniqlangani ma’lum qilindi. Qayd etish kerak, shundan keyin O‘FA Katanesning yig‘inga kelib qo‘shilgani yoki aksincha ekanligi haqida xabar bermadi.

Eslatib o‘tamiz, O‘zbekiston milliy terma jamoasi 2021-yilning sentabr oyida Shvetsiyaga qarshi o‘rtoqlik o‘yini o‘tkazib, 1:2 hisobida mag‘lub bo‘lgandi. Oktabr oyidagi o‘rtoqlik uchrashuvlarida Malayziya (5:1) ustidan g‘alaba qozonib, Iordaniyaga qarshi o‘yinda (0:3) yengildi. Noyabr oyida esa Gruziyaga kichik hisobda (0:1) mag‘lub bo‘ldi.