O‘zbekiston yo‘llarida so‘nggi kunlarda sodir bo‘lgan hodisalar tafsilotlarini taqdim etamiz.
Jizzaxda Cobalt ag‘darildi
2022-yilning 15-yanvar kuni soat 19:40 larda Forish tumanidan o‘tgan 4R-36 Jizzax–Forish–Qizilcha avtomobil yo‘lining 29-kilometrida Cobalt avtomobili haydovchisi o‘zidan avvalgi avtomobilni quvib o‘tishda rul boshqaruvni yo‘qotib, yo‘lning o‘ng tomoniga chiqib, ag‘darilib ketgan.
Oqibatda avtomobildagi yo‘lovchi olgan tan jarohati bilan shifoxonaga yotqizilgan.
Buxoroda to‘qnashuv oqibatida Nexia-3 anhorga tushib ketdi
Buxoroda Nexia-3 hamda Cobalt avtomashinalarining o‘zaro to‘qnashuvi oqibatida Nexia-3 katta anhorga tushib ketdi. Jabrlanganlar yo‘q. Bu haqda “Daryo”ga viloyat Favqulodda vaziyatlar boshqarmasi matbuot xizmati rahbari Mirjon Fayzullayev xabar berdi.
Ta’kidlanishicha, 2022-yilning 19-yanvar kuni soat 10:45 da viloyat Favqulodda vaziyatlar boshqarmasi dispetcherlik xizmatiga Buxoro shahri va Buxoro tumanlari hududidan kesib o‘tuvchi katta “Jo‘ybor” anhoriga Nexia-3 avtomashinasi tushib ketgani to‘g‘risida xabar kelib tushgan. Qutqaruv guruhi voqea joyiga soat 10:54 da yetib borgan. G‘avvoslar hamda aholining tezkor ko‘magi bilan avtomashina soat 11:35 da katta anhordan chiqarib olingan.
Holatga ko‘ra, Jo‘ybor anhori yo‘lidan o‘ziga tegishli bo‘lgan Nexia-3 avtomashinasida harakatlanib borayotgan fuqaro S.A. yo‘lning aylanma qismidan mashinasini qatnov yo‘liga burib olishi paytida unga qarama-qarshi tomondan harakatlanib kelayotgan Cobalt avtomobili kelib urilgan. To‘qnashuv oqibatida S.A. boshqaruvni yo‘qotib qo‘ygan va avtomashinasi anhorga tomon sirpanib ketgan.
“Nexia-3 haydovchisi to‘qnashuv oqibatida boshqaruvni yo‘qotib qo‘ygan bo‘lsa-da, hodisa chog‘ida sergaklik bilan mashinadan sakrab tushishga ulgurgan. Mashina salonida boshqa hech kim bo‘lmagan”, – deydi Mirjon Fayzullayev.
Ma’lumot berilishicha, hodisa natijasida jabrlangan va halok bo‘lganlar yo‘q.
Cobalt’ning orqa tomoniga to‘qnashgan Spark avtomobilida yong‘in yuzaga keldi
2022-yil 20-yanvar kuni soat 20:45 larda, Navoiy viloyati, Navoiy shahri, I.Karimov ko‘chasida haydovchi, 1993-yilda tug‘ilgan F.M. Spark rusumli avtomobilda harakatlanayotib, o‘zi bilan bir yo‘nalishda, oldinda bo‘lgan haydovchi, 1991-yilda tug‘ilgan K.I. boshqaruvidagi Cobalt rusumli avtomobilning orqa tomoniga to‘qnashgan va zarb oqibatida Spark avtomobilining dvigatel qismida yong‘in yuzaga kelgan.
YTH va yong‘in oqibatida tan jarohati olgan fuqarolar yo‘q. Yong‘in bartaraf etilgan.
Mazkur holat yuzasidan Navoiy shahar IIB YHXB xodimlari tomonidan surishtiruv olib borilmoqda.
Izoh (0)