Бухородаги қатор туманлар ички ишлари таркибида лавозим ўзгаришлари бўлди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, ИИВ Академиясида кадрларни тайёрлаш жараёнига бакалавриат ва магистратурани ўз ичига олувчи икки босқичли олий таълим тизими жорий этилган. Вилоят Ички ишлар бошлиғининг биринчи ўринбосари, Когон тумани ҳамда Жондор тумани ички ишлар бўлими бошлиқларининг мазкур олий таълимга ўқишга киргани муносабати билан бўш ўринлар шаклланиб, лавозимларда ўзгаришлар бўлган.
Шунга кўра, ички ишлар вазирининг шахсий таркиб бўйича буйруғи билан подполковник Абдухалил Носиров Пешку тумани Ички ишлар бўлими бошлиғи лавозимига тайинланган. Тайинловга қадар у Ғиждувон тумани ички ишлар бошқармаси бошлиғининг биринчи ўринбосари — тезкор-қидирув хизмати бошлиғи лавозимида фаолият юритган.
Вилоят Ички ишлар бошқармаси Хавфсиз туризмни таъминлаш бошқармаси бошлиғининг ўринбосари — мувофиқлаштириш бўлими бошлиғи лавозимида фаолият юритган Умиджон Ҳасанов Когон тумани Ички ишлар бўлими бошлиғи лавозимига тайинланган.
Худди шунингдек, Пешку тумани Ички ишлар бўлими бошлиғи лавозимида фаолият юритган Ниёзий Болтаев Жондор тумани Ички ишлар бўлими бошлиғи лавозимига тайинланган.
Вилоят Ички ишлар бошқармаси бошлиғи ўринбосари – Хавфсиз туризмни таъминлаш бошқармаси бошлиғи лавозимида фаолият юритган Эркин Сафаров эса вилоят Ички ишлар бошқармаси бошлиғининг биринчи ўринбосари – Тезкор-қидирув хизмати бошлиғи лавозимига тайинланган.
Эслатиб ўтамиз, аввалроқ Ички ишлар вазирлиги тизимида янги лавозим тайинловлари амалга оширилганди. Бундан ташқари, Хоразм ИИБ тизимида ҳам бир қатор тайинловлар кузатилган.
Изоҳ (0)