Samarqandda IT-tanlovda g‘olib bo‘lgan o‘quvchiga eski noutbuk berilgani ortidan tuman XTB xodimi ishdan bo‘shatildi

Ijtimoiy tarmoqlarda Samarqand viloyatining Nurobod tumanida yashovchi o‘quvchi “Bir million dasturchi” loyihasida birinchi o‘rin olgani va unga ishlatilgan noutbuk sovg‘a qilingani to‘g‘risida xabar berilgandi. Mazkur holat yuzasidan bir nafar mas’ul shaxs lavozimidan ozod etildi, deb xabar bermoqda “Daryo” muxbiri.

Qayd etilishicha, Nurobod tumani Xalq ta’limi bo‘limi ta’lim jarayoniga AKTni joriy etish sho‘basi bosh mutaxassisi D.A. bilan tuzilgan mehnat shartnomasi 17-yanvardan e’tiboran bekor qilingan. Bunga D.A.ning arizasi asos qilib olingan.

Eslatib o‘tamiz, tumanning 41-umumta’lim maktabining 8-sinf o‘quvchisi Sardor Sattorov “Bir million o‘zbek dasturchilari” loyihasining viloyat bosqichida 1-o‘rinni olishiga qaramay, unga 3-darajali diplom hamda ishlatilgan (eski) noutbuk sovg‘a qilingan. “Bu nomardlar eskini berguncha bitta kitob bilan diplom bersa bo‘lmasmidi? Changini ham artmagan buni, kim bilan necha yildan beri chang bosib yotgan. Shunchalik ham nomardlik bo‘ladimi?”, — deydi o‘quvchining bobosi.

Nurobod tumani hokimining farmoyishi bilan mazkur holatda mas’uliyatsizlikka yo‘l qo‘ygan hokim o‘rinbosariga hayfsan berildi. “‘Bir million o‘zbek dasturchilari’ loyihasi doirasida umumta’lim maktablari o‘quvchilari o‘rtasida o‘tkazilgan IT-tanlovda g‘olib bo‘lgan yoshlarni taqdirlashda mas’uliyatsizlikka yo‘l qo‘ygani uchun tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Navro‘zbek Jaloliddinovga nisbatan Mehnat kodeksining 181-moddasi (intizomiy jazolar) 1-bandiga asosan hayfsan intizomiy jazosi qo‘llanilsin”, — deyiladi farmoyishda.