Ижтимоий тармоқларда Самарқанд вилояти ҳокими Эркинжон Турдимов инсульт оқибатларини бартараф этиш учун Германияга даволаниш учун кетганлиги тўғрисида хабар тарқалди.
Ҳолатга аниқлик киритиш мақсадида «Дарё» мухбири вилоят ҳокимининг матбуот котиби – ахборот сиёсати масалалари бўйича маслаҳатчиси Манучеҳр Мирзаев билан боғланди. Матбуот котиби вилоят ҳокими Эркинжон Турдимов ҳамма ҳокимлар қатори даволанишда эканлигини маълум қилди.
«Ортиқча гап-сўз йўқ, ҳаммаси жойида. Ҳоким 15 январдан ишга чиқади», – деди Манучеҳр Мирзаев.
Ҳозирда ўзи Тошкентда даволанаётганлигини билдирган Манучеҳр Мирзаев вилоят ҳокими Эркинжон Турдимов айни пайтда Германияда ёки Ўзбекистонда даволанаётгани тўғрисидаги саволни очиқ қолдирди.
Айни пайтда Самарқанд вилоятида ким вақтинча ҳоким вазифасини бажараётганлиги ҳам ноаниқ.
Эслатиб ўтамиз, 2021 йилнинг 17 январь куни Турдимов ўз соғлиғини тиклаш мақсадида қисқа муддатли даволаниш таътилига чиққанди. 2021 йил 9 январь куни ҳокимнинг қон босими кўтарилган. Ўша вақтда бу борада маълумот сўралганда «Олдин қон босими билан муаммо йўқ эди у кишида. Айни вақтда ҳоким даволанмаяпти, балки тиббий кўрикдан ўтмоқда. Барчаси яхши, мен у билан 10 дақиқа олдин гаплашдим», — деган эди ҳокимлик матбуот котиби Манучеҳр Мирзаев .
Шунингдек, ўша йили меҳнат таътилига кўрсатилган муддатидан 5 кун олдин чиққан Эркинжон Турдимов таътил тугагандан сўнг ҳам икки кун дам олиб кейин, ишга чиққанди.
Изоҳ (0)