“O‘zbekneftgaz” AJ boshqaruvi raisi Mehriddin Abdullayev boshchiligidagi ishchi guruh Ustyurt gaz qazib chiqarish boshqarmasida uglevodorod xomashyosi qazib chiqarishni ko‘paytirish dasturi doirasida quduqlarni burg‘ilash, texnologik obyektlar va gaz quvurlari loyihalari ijrosi holati bilan tanishdi.
Jumladan, dastur doirasidagi ishlarni amalga oshirishga ERIELL Oilfield Services Middle East DMCC kompaniyasi bosh pudratchi sifatida jalb qilingan bo‘lib, hozirda 21 ta zamonaviy texnologik jihozlangan dastgohlar yordamida quduqlarni burg‘ilash ishlari olib borilmoqda.
2021-yilda 102 ta, dastur boshidan jami 437 ta yangi ishlatish quduqlari burg‘ilanib, ishlab chiqarishga topshirilgan. Ustyurt hududida quduqlarni burg‘ilash ishlariga 5 ta burg‘ilash dastgohlari jalb qilingan.
Dastur doirasida “O‘zbekneftgaz” AJ mutaxassislari tomonidan “Sharqiy Berdaq” koni hududida 63-sonli ishlatish baholash (OE) qudug‘i ma’lumotlarini kompleks tahlil qilish asosida konning quyi Yura yotqiziqlarida yangi istiqbolli qatlamlarini ochish maqsadida 4300 metr chuqurlikkacha burg‘ilash taklif qilingan edi. Hozirda quduq tubi qariyb 3900 metr bo‘lib, burg‘ilash ishlari davom ettirilmoqda.
Shu bilan birgalikda, ishchi guruh burg‘ilash ishlari olib borilayotgan “Quyi Surgil” konidagi 21-sonli qudug‘idagi burg‘ilash jarayoni bilan yaqindan tanishdi. Quduqning loyihaviy chuqurligi 4300 metr bo‘lib, mutaxassislar tomonidan konning quyi Yura qatlamlarini yanada chuqur o‘rganish maqsadida ushbu quduqni 4500 metr chuqurlikkacha burg‘ilash bo‘yicha qaror qilindi va quduq ushbu chuqurlikkacha burg‘ilandi. Hozirda quduqqa ishlatish quvurlarini tushirish va o‘zlashtirish uchun tayyorlash ishlari olib borilmoqda.
Shu ta’kidlash lozimki, “O‘zbekneftgaz” AJ mutaxassislarining sa’y-harakatlari evaziga Ustyurt hududida ayrim quduqlarning qurilish konstruksiyalariga o‘zgartirishlar kiritildi va loyihaviy chuqurlikka nisbatan qo‘shimcha burg‘ilash ishlari olib borildi. Bu esa o‘z natijasini berdi, quduqlardan kutilgan mahsulotga nisbatan 4—5 barobar ko‘p miqdordagi tabiiy gaz oqimi olinishiga erishildi.
Jumladan, “Quyi Surgil” 14, 20-sonli va “Sharqiy Berdaq” 96-sonli quduqlarning har biridan kunlik debiti 1,0 million kub metrgacha bo‘lgan gaz oqimi olindi. Dastur doirasida quyi Yura qatlamlariga qazilayotgan yuqori mahsuldor quduqlarni burg‘ilash uchun atrofida ishlayotgan quduqlar holati, konning amaldagi geologik va gidrodinamik modellarini chuqur o‘rganib chiqqan holda quduqlar o‘rni belgilangan.
Dastur doirasida uglevodorod xomashyosi qazib chiqarish hajmini oshirish, konlardan gazni kompleks tayyorlash qurilmalarigacha va qurilmalardan magistral gaz quvurlarigacha uzatish tizimlari quvvatini oshirish uchun texnologik obyektlar va 83,5 kilometr uzunlikdagi turli o‘lchamdagi gaz quvurlari ishga tushirildi.
Xususan, Ustyurt hududida 2021-yil davomida “Quyi Surgil” va “Arslon” konlaridan gaz qazib chiqarishni yanada ko‘paytirish va quvurlarning gaz uzatish quvvatini oshirish maqsadida “Arslon” gazni kompleks tayyorlash qurilmasigacha uzunligi 8,2 kilometr, “Shimoliy Berdaq” konidan “Sharqiy Berdaq” gazni kompleks tayyorlash qurilmasigacha uzunligi 6,2 kilometr quvurlar ishga tushirildi.
Bundan tashqari, “Arslon” va “Sharqiy Berdaq” gazni kompleks tayyorlash qurilmalaridan “O‘ztransgaz” AJ magistral gaz quvurlariga gaz uzatish quvurlarining gaz o‘tkazish quvvatini oshirish maqsadida, uzunligi 17 kilometr gaz quvuri, jami bo‘lib esa 31,4 kilometr quvurlar ishga tushirilib, foydalana boshlandi.
Dastur doirasida texnologik qurilmalarni qurish va ishga tushirish bo‘yicha “Muborak” hududidagi “Dengizko‘l” konida gaz siquv kompressor stansiyasining 2-navbatini, Sho‘rtan boshqarmasidagi “Janubiy Tandircha” konida siquv kompressor stansiyasi qurilish montaj ishlari jadal sur’atlar bilan olib borilmoqda.
“O‘zbekneftgaz” AJ va ERIELL Oilfield Services Middle East DMCC kompaniyasi 2022—2023-yillarda ham uglevodorod xomashyosi qazib chiqarishni ko‘paytirish dasturi doirasida quduqlarni burg‘ilash, texnologik obyektlarni qurish va ishga tushirish yo‘nalishida samarali hamkorlikni davom ettiradi.
“O‘zbekneftgaz” AJ matbuot xizmati
Izoh (0)