Farg‘ona viloyatining Uchko‘prik tumanida 2021-yilning 31-dekabr kuni hammomdagi gaz portlashi oqibatida uch kishi vafot etgani haqida xabar berilgan edi. “Daryo” muxbiri ushbu hodisaga guvoh bo‘lgan fuqarolar va mas’ullar bilan suhbatlashib, voqea joyidan reportaj tayyorladi.

Foto: “Daryo”

Ma’lum bo‘lishicha, portlash sodir bo‘lgan Uchko‘prik tumanining “Navro‘z” MFY Qorayantoq qishlog‘idagi binoda umumiy foydalanishdagi hammom, oshxona hamda choyxona faoliyat ko‘rsatgan. Bino tabiiy gaz tarmog‘iga ulangan va “Hududiy gaz ta’minoti” korxonasining Buvayda tumani filiali tomonidan gaz bilan ta’minlangan.

Foto: “Daryo”

Foto: “Daryo”

Favqulodda vaziyatlar boshqarmasi ma’lumotiga ko‘ra, 31-dekabr kuni, taxminan, soat 17:00 da hammomda gaz-havo aralashmasi chaqnashi yuz berib, binoning tom qismi qulab tushgan. Hodisa oqibatida uch kishi voqea joyida halok bo‘lgan, to‘rt nafar fuqaro turli darajada tan jarohati olib, shifoxonaga yotqizilgan.

Foto: “Daryo”

Foto: “Daryo”

“2021-yilning 31-dekabr kuni soat 17:00 larda Uchko‘prik tumani Qorayantoq qishlog‘ida joylashgan hammomda gaz-havo aralashmasi chaqnashi yuzaga kelgan. Chaqnash oqibatida hammomning tom qismi qulab tushgan. Voqea joyiga viloyat Favqulodda vaziyatlar boshqarmasining yong‘in-qutqaruv guruhi zudlik bilan jalb etilib, tongga qadar qidiruv-qutqaruv ishlari olib borildi.

Foto: “Daryo”

Foto: “Daryo”

Hodisa oqibatida uch nafar fuqaro voqea joyida vafot etgan, to‘rt kishi turli darajadagi tan jarohatlari bilan tuman shifoxonasiga joylashtirilgan. Hozirda favqulodda vaziyatlar, ichki ishlar, sog‘liqni saqlash, prokuratura va boshqa tegishli xizmatlar xodimlaridan iborat ishchi guruh tuzilib, tergovga qadar surishtiruv harakatlari olib borilmoqda”, — deydi viloyat Favqulodda vaziyatlar boshqarmasi axborot xizmati rahbari Ahliddin Alijonov.

Foto: “Daryo”

Portlash oqibatida binoning tomi va devorlari qulaganini, eshik va romlari ko‘chib tushganini, oynalari butunlay singanini ko‘rish mumkin. Shu mahallada yashovchi Iminjon Razzoqovning aytishicha, u portlash ovozini eshitgan va hammom tomondan tutun chiqayotganini ko‘rib, hodisa joyiga birinchilardan bo‘lib yetib kelgan. Yordam so‘rab baqirayotgan bir kishini qutqargan va bino ichkarisiga yo‘l ochish uchun maxsus texnikalarni olib kelishga ko‘maklashgan.

Foto: “Daryo”

Foto: “Daryo”

“Hodisa, adashmasam, soat 16:00 lar atrofida sodir bo‘ldi. Uyimizda mehmonlar bor edi. Ularga ovqat tashkillashtirib, hovlida turgandim. Birdaniga kuchli ovoz eshitildi va hammom tomonda tutun ko‘rindi. Shunda bu yerga qarab yugurib keldim. Hammomning orqa tarafida bir yigit yordam so‘rayotganini ko‘rib, uni qutqarishga harakat qildim. Hammomning tomi tushib ketgan ekan, qulagan plitalarni qo‘l bilan olish va bino ichkarisiga yo‘l ochishning iloji bo‘lmadi. Shuning uchun men kran chaqirgani ketdim. Qaytib kelib, bir kishi halok bo‘lganini ko‘rdim”, — deydi Iminjon Razzoqov.

Foto: “Daryo”

Samsung maxsus texnikasi haydovchisi Bekzod Qodirovning ma’lum qilishicha, u tungi soat ikki yarimgacha bino ichkarisiga yo‘l ochish va qidiruv-qutqaruv ishlarida favqulodda vaziyatlar bo‘limi xodimlariga yordam bergan.

“Qo‘shni qishloqda yashayman, Samsung maxsus texnikam bor. Hammomda shunaqa ish bo‘ldi, deb yordamga chaqirishdi. 17:30—18:00 larda keldim. Binoning orqa tomoni qulab tushgan, hamma narsa sochilib, maydalanib ketgan ekan. Kechasi soat ikki yarimgacha katta kranga ichkariga kirishi uchun yo‘l ochib berdik”, — deydi Bekzod Qodirov.

Foto: “Daryo”

Portlash vaqtida bino ichkarisida bo‘lgan, tan jarohati olib, shifoxonaga yotqizilgan bemorlar bilan suhbatlashish uchun Uchko‘prik tuman tibbiyot birlashmasiga bordik.

Bahodir Ergashev.

Foto: “Daryo”

“Shoshilinch tez tibbiy yordam bo‘limiga 31-dekabr kuni Qorayantoq qishlog‘ida sodir bo‘lgan baxtsiz hodisa oqibatida jarohatlangan ikki nafar fuqaro murojaat qildi. Ularga birinchi tibbiy yordamni ko‘rsatib, bo‘limga joylashtirdik. Hozirda bemorlar — Shukrullo O‘sarov va Murodjon Abdulhamidovning holati yaxshi, ularda jiddiy tan jarohatlari yo‘q. Qo‘l va yuz sohalarida tilingan va lat yegan joylari bor, shifokorlar nazoratida belgilangan tibbiy muolajalarni olishyapti. Ikki-uch kunda uylariga ketishga ruxsat beriladi”, — deydi Uchko‘prik tumani tibbiyot birlashmasi shoshilinch tez tibbiy yordam bo‘limi travmatolog-shifokori Bahodir Ergashev.

Portlash oqibatida jarohatlangan Murodjon Abdulhamidovning aytishicha, u 31-dekabr kuni 15:30 da uch nafar tanishi bilan hammomga borgan. Ikki sherigi hodisa joyida vafot etgan, o‘zi esa yengil tan jarohati olgan.

Murodjon Abdulhamidov.

Foto: “Daryo”

“O‘sha kuni 15:30 larda o‘rtoqlarim bilan hammomga cho‘milishga borgandik. Cho‘milib bo‘lib, chiqmoqchi bo‘lib turganimizda portlash yuz berdi. Hushimdan ketib, yiqilib tushdim. O‘sha yerda 5-10 daqiqa yotdim. O‘zimga kelib, o‘rnimdan turib, tashqariga yugurib chiqdim. Boshida nima bo‘lganini tushunmadim. Tezda odamlar to‘plandi. Men shifoxonaga keldim. Keyin bilsam, men bilan birga hammomga borgan ikki sherigim vafot etibdi. Xudoga shukur, hozir ancha yaxshiman. Qolgan o‘rtoqlarim ham yaxshi ekan. Bir-ikki kunda tuzalib, chiqib ketamiz”, — deydi Murodjon Abdulhamidov.

Shukrullo O‘sarov ham hodisa yuz bergan vaqtda hammom ichida bo‘lgan.

Shukrullo O‘sarov.

Foto: “Daryo”

“31-dekabr kuni soat 15:30—16:00 lar atrofida cho‘milgani hammomga bordim. U yerga kirdim, 10 daqiqacha cho‘mildim. Cho‘milib bo‘lib, tashqariga chiqib, kiyinayotgan paytimda orqadan bir narsa gumburladi. O‘shanda yiqildim. Turib qaraganimda portlash bo‘lganini bildim. Keyin tashqariga yugurib chiqdim. Tashqariga chiqib qo‘limdan qon ketayotganini ko‘rdim. Birinchi yordamni ko‘rsatib, qo‘limni bilak qismidan bog‘lab, qonni to‘xtatishga harakat qildim. Keyin o‘zimning mashinamda shifoxonaga keldim. Hammomning men kirgan xonasida yana uch kishi bor edi”, — deydi Shukrullo O‘sarov.

Tuman tibbiyot birlashmasi shifokorlarining ma’lum qilishicha, hozirda tan jarohati olgan uch nafar bemorning holati yaxshi, bir kishining holati esa o‘rta og‘ir darajada, ayni paytda u jonlantirish bo‘limida qolmoqda.

Muallif:Azizjon Ermatov