Buyuk Britaniyaning Metito Utilities Limited kompaniyasi “Namangan shahar oqova suv tozalash inshootini davlat-xususiy sheriklik shartlari asosida qurish” loyihasi bo‘yicha tenderda g‘oliblikni qo‘lga kiritdi, deb xabar beradi Moliya vazirligi matbuot xizmati.
Mazkur loyiha O‘zbekiston prezidentining 2018-yil 30-noyabrdagi “O‘zbekiston Respublikasida ichimlik suvi ta’minoti va kanalizatsiya tizimlarini rivojlantirish bo‘yicha qo‘shimcha chora-tadbirlar to‘g‘risida”gi 4040-sonli qaroriga muvofiq Osiyo taraqqiyoti banki ko‘magida Uy-joy kommunal xizmat ko‘rsatish vazirligi, “O‘zsuvta’minot” AJ hamda Davlat-xususiy sheriklikni rivojlantirish agentligi tomonidan amalga oshirilmoqda.
Loyiha bo‘yicha 2 bosqichli ochiq va shaffof tender jarayonlari o‘tkazilgan. 1-bosqichda loyihaga qiziqish bildirgan 23 ta xorij kompaniyaga dastlabki malakani baholash (RFQ) shartlari yuborilgan. Tender jarayonining 2-bosqichida Buyuk Britaniyaning Metito Utilities Limited kompaniyasi hamda Niderlandiyaning Almar Water Solutions BV konsorsium kompaniyasi ishtirok etgan.
Moliyaviy takliflar bo‘yicha yillik erkin foydalanganlik uchun to‘lov bo‘yicha Metito Utilities Limited kompaniyasi tomonidan 97,5 milliard so‘m va Niderlandiya davlatining Almar Water Solutions BV konsorsium kompaniyasi tomonidan 103,1 milliard so‘m taklifi bildirgan.
20-dekabr kuni mazkur loyiha bo‘yicha idoralararo tender komissiyasi tomonidan Metito Utilities Limited kompaniyasi moliyaviy takliflar bo‘yicha yillik erkin foydalanganlik uchun to‘lovning eng past narxini, ya’ni yillik to‘lov 9 million dollarni taklif etgan va xalqaro tender g‘olibi deb topilgan.
Loyiha doirasida quvvati sutkasiga 100 ming metr kub oqova suvlarini tozalashga mo‘ljallangan inshootni va 7,5 kilometr uzunlikdagi oqova suv tarmoqlarini qurish nazarda tutilgan.
Avvalroq Toshkent shahrining issiqlik ta’minoti boshqaruvi 30 yilga Fransiyaning Veolia kompaniyasiga berilgani, Surxondaryoda aholini toza ichimlik suvi bilan ta’minlaydigan yirik loyiha boshlangani to‘g‘risida xabar berilgandi.
Izoh (0)