Xitoy AQShning Shinjondan tovarlarni import qilishni taqiqlash to‘g‘risidagi qonuniga javob qaytaradi

Xitoy AQShda Shinjon-Uyg‘ur avtonom hududidan tovarlar importini taqiqlashni nazarda tutuvchi qonun qabul qilingani sabab keskin norozilik bildirdi va bunga qarshi javob chorasi ko‘rilishini ma’lum qildi. Bu haqda Xitoy TIV vakilining bayonotiga tayanib, “Interfaks” xabar berdi.

Oq uyning ma’lum qilishicha, AQSh prezidenti Jo Bayden Qo‘shma Shtatlarga Shinjondan tovarlar olib kirishni taqiqlovchi va Shinjon-Uyg‘ur avtonom respublikasida majburiy mehnatga aloqador alohida shaxslarga sanksiyalar joriy etish to‘g‘risidagi qonunni imzolagan.

“Xitoy bundan qattiq g‘azablanib, keskin norozilik bildirmoqda”, — deya ta’kidlaydi Xitoy TIV vakili.

Bayonotda qayd etilishicha, AQSh “Shinjondagi inson huquqlari holatiga qasddan tuhmat qilmoqda, xalqaro huquq va xalqaro munosabatlarning asosiy me’yorlarini jiddiy ravishda buzib, Xitoyning ichki ishlariga qo‘pol aralashmoqda”.

“Xitoy vaziyatning rivojlanishidan kelib chiqib keyingi harakatlarni qabul qiladi”, — deya ogohlantiradi Xitoy tashqi siyosiy idorasi. Xitoy TIV vakili Shinjon bilan bog‘liq ishlar mamlakatning ichki ishlari ekanini ta’kidlab, milliy suverenitetni himoya qilish, xavfsizlik va rivojlanish manfaatlaridan og‘ishmasligini bildirgan.

Avvalroq AQSh, Kanada va Buyuk Britaniya Xitoyni “uyg‘urlar genotsidi”da ayblab, unga qarshi sanksiyalar kiritgan edi. Shuningdek, AQSh uyg‘urlarga qilinayotgan zug‘umlar sabab Shinjondan paxta importini cheklab qo‘ygan.